គម្រោងជួបពិភាក្សាគ្នារវាងលោកនាយករដ្ឋមន្ត្រីហ៊ុន សែន និងលោកសូរីយ៉ា ប្រាសាទ ស៊ូបេឌី អ្នករាយការណ៍ពិសេសរបស់អគ្គលេខាធិការអង្គការសហប្រជាជាតិ ត្រូវបានមន្ត្រីតំណាងអង្គការសង្គមស៊ីវិល និងអ្នកវិភាគមើលឃើញថា វាជាសញ្ញាដ៏ល្អក្នុងការបន្ធូរបរិយាកាសអាប់អួរនៅកម្ពុជា។ អ្នកវិភាគ និងមន្ត្រីជាន់ខ្ពស់អង្គការការពារសិទ្ធិមនុស្សបានហៅការជួបគ្នានោះ ថាជាឱកាសដែលរដ្ឋាភិបាលនិងអ្នកជំនាញសិទ្ធិមនុស្សរបស់UN អាចជជែកអំពីអំពើហិង្សា និងបញ្ហាទំនាស់ផ្នែកនយោបាយនៅកម្ពុជាផងដែរ។
យោងតាមសេចក្តីប្រកាសព័ត៌មានរបស់ការិយាល័យឧត្តមស្នងការសិទ្ធិមនុស្សអង្គការសហប្រជាជាតិ លោកសាស្ត្រាចារ្យស៊ូរិយ៉ា ប្រាសាទ ស៊ូបេឌី អ្នករាយការណ៍ពិសេសរបស់អគ្គលេខាធិការអង្គការសហប្រជាជាតិនឹងជួបជាមួយលោកនាយករដ្ឋមន្ត្រីហ៊ុន សែន នៅក្នុងដំណើរទស្សនកិច្ចលើកទី១០របស់លោកនៅកម្ពុជានៅសប្តាហ៍ក្រោយនេះ។
គម្រោងជំនួបរវាងអ្នកជំនាញសិទ្ធិមនុស្សរបស់អង្គការសហប្រជាជាតិ និងប្រមុខរដ្ឋាភិបាលកម្ពុជា បានក្លាយជាករណីពិសេសមួយនៅពេលនេះ ដោយសារតែ នៅក្នុងដំណើរទស្សនកិច្ចមុនៗ លោកស៊ូបេឌីមិនដែលបានជួបលោកនាយករដ្ឋមន្ត្រី បើទោះមានការស្នើសុំជួបក៏ដោយ។
តើជំនួបអ្នកទាំងពីរនៅពេលនេះមានអត្ថន័យដូចម្តេច?
ក្រុមអ្នកដឹកនាំអង្គការសិទ្ធិមនុស្សនៅកម្ពុជាបាននិយាយដូចៗគ្នាថា វាជាសញ្ញាល្អ។ ជាសញ្ញាល្អនៃការផ្សះផ្សារស្នាមនៃការប៉ះទង្គិចគ្នារវាងអង្គការសហប្រជាជាតិ និងរដ្ឋាភិបាលភ្នំពេញផង និងជាឱកាសដែលការទូតទាំងពីរត្រូវលើកឡើងអំពីករណីហិង្សាកន្លងមករវាងសមត្ថកិច្ច និងបាតុករ ដែលបានធ្វើអោយមនុស្សស្លាប់ជាបន្ទាប់។ ជាហេតុការណ៍ហិង្សានៅក្រោយការបោះឆ្នោតនីតិកាលទី៥នៅកម្ពុជា។
«វាជាឱកាសដែលរដ្ឋាភិបាល ត្រូវពន្យល់ប្រាប់តំណាងអង្គការសហប្រជាជាតិ ដើម្បីបន្ថយភាពតានតឹងបន្ទាប់ពីខ្លួនបានប្រើប្រាស់ការបង្ក្រាបយ៉ាងធ្ងន់ធ្ងរ ទៅលើក្រុមអ្នកតវ៉ានៅក្រោយការបោះឆ្នោត»។ នេះជាការអត្ថាធិប្បាយរបស់លោកធន់ សារ៉ាយ ប្រធានអង្គការការពារសិទ្ធិមនុស្សអាដហុក។ លោកធន សារ៉ាយ បានអះអាងថា៖«វាជារឿងចាំបាច់ ដែលលោកនាយករដ្ឋមន្ត្រីត្រូវជួបលោកស៊ូបេឌី ព្រោះរដ្ឋាភិបាលអាចមានឱកាសដើម្បីបញ្ជាក់ប្រាប់ពិភពលោកពីការបង្ក្រាបរបស់ខ្លួនកាលពីប៉ុន្មានថ្ងៃមុន ដែលរងការរិះគន់ពីអន្តរជាតិ»។
លោកអ៊ូ វីរៈប្រធានមជ្ឈមណ្ឌលសិទ្ធិមនុស្សកម្ពុជាមានជំនឿថា ការជួបគ្នារវាងលោកហ៊ុន សែន និងអ្នករាយការណ៍ពិសេសនាពេលខាងមុខនេះ នឹងអាចធ្វើឲ្យស្ថានភាពនយោបាយដែលកំពុងតានតឹងមានភាពធូរស្រាលជាមុន។ លោកបញ្ជាក់ថា៖« បញ្ហាបាតុកម្មរបស់គណបក្សប្រឆាំង ការបង្ក្រាបលើបាតុករ និងការបាញ់សំលាប់អ្នកតវ៉ាកន្លងមកនេះ នឹងត្រូវបានយកមកជជែកឲ្យជាក់លាក់រវាងរដ្ឋាភិបាល និងតំណាងអង្គការសហប្រជាជាតិ»។ យ៉ាងណាក៏ដោយលោកអ៊ូ វីរៈ បានអះអាងថាសង្គមស៊ីវិលនឹងតាមដានលទ្ធផលនៃជំនួបនោះ។
ការជាប់គាំងនៃការដោះស្រាយបញ្ហារវាងគណបក្សជាប់ឆ្នោតទាំងពីរ លើយន្តការកែទម្រង់ការបោះឆ្នោតនោះ ត្រូវបានលោកកែម ឡីអ្នកវិភាគឯករាជ្យនៅកម្ពុជា មានជំនឿថា អាចនឹងត្រូវបានលោក ហ៊ុន សែន លើកយកមកជជែកជាមួយលោកស៊ូបេឌី។ បើតាមលោកកែម ឡី ការកែទម្រង់ការបោះឆ្នោត គឺជាប្រធានបទដ៏សំខាន់ដែលអាចជួយបន្ថយសម្ពាធនយោបាយដែលកំពុងពុះកញ្ជ្រោល។ លោកបញ្ជាក់ថា៖« គាត់អាចជំរុញឲ្យប្រមុខបក្សជាប់ឆ្នោតទាំងពីរកសាងទំនុកចិត្តដល់គ្នា ដើម្បីឈានទៅធ្វើកំណែរទម្រង់ការបោះឆ្នោតដ៏ជាក់លាក់» ទោះយ៉ាងណាក៏ដោយ គេត្រូវនៅរង់ចាំមើល និងស្តាប់លទ្ធផលនៃជំនួបដ៏កម្រនោះ៕
Blogger Comment
Facebook Comment