បុរសវ័យខ្មែរចំណាស់មួយចំនួន កំពុងរងការរិះគន់ពីសំណាក់យុវតីវ័យជំនាន់ក្រោយ ដោយសារ តែបុរសចំណាស់ទាំងនោះបានប្រើឥរិយាបថមិនសមគួរមួយចំនួនទៅកាន់ពួកគេ។ បុរសចំណាស់ ខ្លះចូលចិត្តចោលក្រសែភ្នែកសម្លក់សម្លឹងមើលដងខ្លួននារីវ័យក្មេងស្ទើរតែមិនព្រិចភ្នែក។ អ្នកខ្លះទៀត ប្រើពាក្យសម្តីផ្អែមល្ហែមហៅនារីវ័យក្មេងថា«អូន» លួងលោមក្នុងន័យស្នេហា ទាំង ខ្លួនសក់ស្កូវទៅ ហើយនោះ។ បុរសចំណាស់ខ្លះទៀត ប្រើប្រាស់ទ្រព្យសម្បត្តិ និងប្រាក់ដុល្លារធ្វើ ជានុយដើម្បីស្ទូច យក ព្រហ្មចារី ឬខ្លួនប្រាណនារីវ័យក្មេងផងដែរ។
ថ្ងៃមួយនៅពេលដែលកញ្ញាលីនដាទៅចូលរួមសិក្ខាសាលាមួយ នៅសណ្ឋាគារសូហ្វីតែល បុរស វ័យ ជាង៥០ឆ្នាំម្នាក់ បាននិយាយសួរនាំកញ្ញាជាច្រើនអំពីទីកន្លែងធ្វើការ អំពីស្ថានភាពការងារ និងគ្រួសារ ព្រមទាំងប្រាក់បៀវត្សប្រចាំខែផងដែរ។ បន្ទាប់មកបុរសចំណាស់រូបនោះបានបបួលកញ្ញា ទៅធ្វើការ ជាមួយខ្លួន ដោយសន្យាថា៖«ប្រសិនបើលីនដា ទៅធ្វើការជាមួយខ្ញុំ ខ្ញុំនឹងអោយឡានមួយ វីឡាមួយ និងលុយច្រើនទៀតទៅលីនដា។ ហើយការងារនោះមិនលំបាក និងមិនហត់នឿយដូចការងារសព្វថ្ងៃនោះទេ»។ លីនដាអាយុ២១ឆ្នាំបានរៀបរាប់បន្តថា បន្ទាប់ពីបញ្ចប់កិច្ចសន្ទនាគ្នា កញ្ញាក៏បាន បដិសេធបំណងរបស់បុរសនោះភ្លាមៗដែរ ព្រោះកញ្ញាយល់ថាអ្វីដែលបុរសចំណាស់នោះនិយាយគឺជាបំណងអាក្រក់។ កញ្ញាបន្ថែមទៀតថា ខ្លួនធ្លាប់ជួបបុរស ចំណាស់ជាច្រើននាក់ហើយដែលនិយាយ យ៉ាងដូច្នេះមកកាន់កញ្ញា ហើយកញ្ញាបានកត់សម្គាល់ថា នៅក្នុងសង្គមបច្ចុប្បន្ននេះ មានបុរសវ័យ ចំណាស់ជាច្រើនកំពុងឈ្លក់វង្វេងនឹងការសប្បាយរបស់ខ្លួន មិនសូវខ្វាយខ្វល់នឹងផលប៉ះពាល់ដល់ សីលធម៌នៅក្នុងសង្គមនោះទេ។
«បុរសចំណាស់ខ្លះ មានចរិតមិនសូវល្អទេ។ និយាយស្តីមិនសមអោយក្មេងគោរព។ ហើយគ្មាន សីលធម៌ទៀត។ ចូលចិត្តយកលុយមកជះលើស្ត្រីវ័យក្មេងណាស់»។ នេះជាការរិះគន់របស់ កញ្ញា និមល។ និមល វ័យ២៣ឆ្នាំជាបុគ្គលិកផ្នែកលក់នៅក្នុងក្រុមហ៊ុនទូរស័ព្ទដៃក្នុងផ្សារទំនើបមួយ កន្លែងក្នុងទីក្រុងភ្នំពេញ បានអោយដឹងថា អតិថិជនជាបុរសវ័យចំណាស់មួយចំនួនបាននិយាយលែប ខាយពាក្យសម្តីទៅកាន់កញ្ញាជាច្រើន និងបានអួតអាងថាខ្លួនជាអ្នកមាន ហើយអាចឧបត្ថមអ្វីៗអោយ បានគ្រប់យ៉ាងផងដែរ។ កញ្ញានិមលរៀបរាប់ពីសំដីបុរសអតិថិជនម្នាក់ដែលធ្លាប់ព្យាយាមទំនាក់ទំនងកញ្ញាថា៖«ទៅញ៉ាំបាយជាមួយ បងទេ។ ចាំបងយកឡានមកយក។ ប្រសិនបើអត់លុយចាយអាចប្រាប់បងបាន។ ខ្វះខាតអីប្រាប់បងមក ចាំបងជួយ។ អោយតែអូនទៅដើរលេងជាមួយបងអូនចង់បានអីក៏បានដែរ»។ បន្ថែមពីនេះទៀត កញ្ញា និមលអោយដឹងថា ធ្លាប់មានប្តីប្រពន្ធវ័យចំណាស់មួយគូរឈ្លោះប្រកែកគ្នាសឹងតែផ្អើលហាងរបស់ កញ្ញា ព្រោះស្ត្រីជាប្រពន្ធប្រចណ្ឌនឹងស្វាមី របស់ខ្លួនដែលលួចមើលអ្នកលក់ជានារីវ័យក្មេង ខណៈពេល ដែលពួកគាត់ចូលមករកទិញទូរសព្ទ។
ងាកមកស្តាប់កញ្ញា មករានៅខេត្តកំពង់ចាមវិញ។ កញ្ញាបានរិះគន់ថា៖«បុរសខ្លះ ចាស់ហើយនៅមិន គិតទៅរកធម៌អាថ៍នោះទេ។ ឃើញស្រីស្អាតក្មេងៗមិនបាន ឌឺដងពាក្យសំដី សួររកលេខទូរសព្ទ និងហៅគេ សុទ្ធតែអូន…»។ ក្នុងវ័យ២២ឆ្នាំ និងជាមន្ត្រីរាជការម្នាក់នៅក្នុងខេត្ត កញ្ញាមករា អោយដឹង ថា សហការីជាបុរសចំណាស់មួយចំនួននៅកន្លែងធ្វើការរបស់កញ្ញា ចូលចិត្តដើរកំសាន្តសប្បាយតាម ហាងខារ៉ាអូខេ ហើយយកមកអួតប្រាប់ និងចំអែចំអន់គ្នានៅកន្លែងធ្វើទៀតផង។ មករាបន្តថា ពួកគាត់ ធ្លាប់បង្ហាញរូបភាពស្និទ្ធស្នាលជាមួយនារីវ័យក្មេងៗនៅក្នុងហាងខារ៉ាអូខេ អោយនាងបានឃើញជា ច្រើនដងផងដែរ។ យុវតីដដែលនេះ បង្ហើបប្រាប់ទៀតថា៖«បុរសចំណាស់ខ្លះ ចូលចិត្តនិយាយទូរសព្ទយូរៗរាប់ម៉ោងដូចក្មេងស្ទាវអ៊ីចឹង។ ពេលខ្លះច្រៀងអោយដៃគូរស្តាប់តាមទូរសព្ទ ទៅវិញទៅមកក៏មាន ដែរ»។
យុវតីខាងលើសុទ្ធតែជាសាក្សីដែលបានជួប និងឃើញអកប្បកិរយាផ្សេងៗគ្នារបស់បុរសចំណាស់ខ្មែរក្នុងពេលកន្លងមក។ ប៉ុន្តែស្ត្រីទាំងនេះបានអំពាវនាវដូចគ្នា អោយបុរសចំណាស់ធ្វើជាគំរូរល្អសម្រាប់ក្មេងជំនាន់ក្រោយ ដោយមិនគួរប្រព្រឹត្តិទង្វើដែលធ្វើអោយប៉ះពាល់ដល់សីលធម៌សង្គមដូច្នេះឡើយ៕
Blogger Comment
Facebook Comment