កំពង់ចាម ៖ កម្លាំងនគរបាលក្រសួងមហាផ្ទៃសហការជាមួយកម្លាំងនគរបាលព្រហ្មទណ្ឌខេត្តកំពង់ចាមបានឃាត់ខ្លួនជនសង្ស័យជាជនជាតិកូរ៉េខាងត្បូងម្នាក់នៅវេលាម៉ោង១០និង៣០នាទីថ្ងៃទី១០ ខែមេសា ឆ្នាំ២០១៤ ដែលមកលួចដេកលាក់ខ្លួននៅសណ្ឋាគារមនោរម្យ ស្ថិតក្នុងសង្កាត់-ក្រុង-ខេត្តកំពង់ចាម។
លោកឧត្តមសេនីយ៍ត្រី ប៉ាង ណារ៉េន អនុប្រធាននាយកដ្ឋានសន្តិសុខផ្ទៃក្នុងក្រសួងមហាផ្ទៃបានឲ្យដឹងថា ក្រោយពីលោកបានទទួលបទបញ្ជាពីថ្នាក់លើឲ្យចុះស្រាវជ្រាវតាមចាប់ខ្លួនមុខសញ្ញាជាជនជាតិកូរ៉េម្នាក់ដែលបានធ្វើសកម្មភាពក្លែងបន្លំលួចដកប្រាក់តាមសារអេឡិចត្រូនិចអស់ទឹកប្រាក់ជាច្រើននៅប្រទេសកូរ៉េ។
ជនសង្ស័យឈ្មោះ លី អ៊ិនយ៉ុង ជាជនជាតិកូរ៉េខាងត្បូងត្រូវតុលាការប្រទេសកូរ៉េចេញដីកា និងមាននិវេតក្រហមរបស់នគរបាលអាំងទែប៉ូលឲ្យតាមចាប់ខ្លួនពីបទក្លែងបន្លំលួចដកប្រាក់តាមប្រព័ន្ធអេឡិចត្រូនិច ហើយក៏មានបទបញ្ជាពីប្រធានាធិបតីប្រទេសកូរ៉េបានសុំសហការជាមួយរដ្ឋាភិបាលកម្ពុជាយើងដើម្បីស្វែងរកចាប់ខ្លួនមុខសញ្ញានេះបញ្ជូនទៅប្រទេសកូរ៉េវិញ ដើម្បីធ្វើការកាត់ទោសនៅប្រទេសកូរ៉េ ដោយឡែកបក្សពួករបស់វាត្រូវបានចាប់ខ្លួននៅប្រទេសកូរ៉េ ហើយមុខសញ្ញាដែលបានចាប់ខ្លួននៅចំណុចខាងលើនេះជាមេខ្លោងធំ។
លោកឧត្តមសេនីយ៍បានបញ្ជាក់ទៀតថា កម្លាំងរបស់យើងបានប្រើរយៈចំនួន២ថ្ងៃមកហើយ គឺតាមស្រាវជ្រាវ តាំងពីខេត្តកំពតរហូតបន្តមកតាមចាប់ខ្លួនជនសង្ស័យបាននៅឯខេត្តកំពង់ចាម៕
Blogger Comment
Facebook Comment