កណ្តាលៈ ផ្ទះមួយខ្នង ទំហំ៨ម៉ែត្រគុណនិង៩ម៉ែត្រ ធ្វើអំពីឈើប្រក់ក្បឿង ត្រូវបានអគ្គិភ័យឆាបឆេះអស់ទាំងស្រុង ខណៈម្ចាស់ផ្ទះទាំងប្តីនិងប្រពន្ធមិននៅ ចាក់សោចោល នគរបាលសន្និដ្ឋានថា ការឆាបឆេះនេះ បណ្តាលមកពីទុស្សេខ្សែភ្លើង ហេតុការណ៍នេះកើតឡើង កាលពីវេលាម៉ោង១៤និង០០នាទី ថ្ងៃទី១០ ខែមេសា ឆ្នាំ២០១៤ ស្ថិតនៅក្នុងភូមិស្វាយមាស ឃុំវិហាសួគ៌ ស្រុកខ្សាច់កណ្តាល ខេត្តកណ្តាល។
នគរបាលបានឲ្យដឹងថា ជនរងគ្រោះជាម្ចាស់ផ្ទះ ឈោ្មះ ហេង ចំណាន ភេទ ប្រុស អាយុ ៤៦ឆ្នាំ មុខរបរ កសិករ មានទីលំនៅ ភូមិ ឃុំ កើតហេតុ។
នគរបាលបានបន្តថា មុនពេលកើតហេតុ ជនរងគ្រោះបានចាក់សោផ្ទះ រួចហើយប្រពន្ធទៅលក់ខោអាវ រីឯប្តីវិញទៅរកទិញគោ លុះក្រោយមក ស្រាប់តែមានផ្សែងហុយចេញពីក្នុងផ្ទះ រួចបណ្តាលឲ្យឆាបឆេះយ៉ាងសន្ធោសន្ធៅ ធ្វើឲ្យមានការភ្ញាក់ផ្អើល ដល់នគរបាលមូលដ្ឋាន ចុះមកអន្តរាគមន៍ និងបានហៅរថយន្តពន្លត់អគ្គិភ័យ របស់ស្នងការដ្ឋាននគរបាល ខេត្តកណ្តាល មកជួយពន្លត់ ប៉ុន្តែជួយសង្គ្រោះមិនបាននោះទេ ដោយសារតែទំហំនៃការឆាបឆេះ បានឆេះផ្ទះអស់ទៅហើយ។
នគរបាលបានបន្តទៀតថា ចំពោះការឆាបឆេះនេះ បើតាមការសន្និដ្ឋានជំហានដំបូង គឺបណ្តាលមក ពីការទុស្សេខ្សែភ្លើង ហើយទំហំនៃការខូចខាតនោះ គឺពុំទាន់អាចសន្និដ្ឋានបាននៅឡើយទេ ។ ក្នុងនោះដែរ នគរបាល សូមអំពាវនាវដល់បងប្អូន ទាំអស់ ត្រូវពិនិត្យមើលខ្សែភ្លើងរបស់យើងផង កុំទុកឲ្យវាស់ចាស់ៗពេក នាំឲ្យវាកើតជាអគ្គិភ័យ ធ្វើឲ្យបាត់បង់ទ្រព្យសម្បត្តិ ដែលយើងខិតខំសន្សំទុក ជាយូរមកហើយនោះ៕
Blogger Comment
Facebook Comment