-------------
ភ្នំពេញ: នៅក្នុងរយៈពេល៣ថ្ងៃ ពីថ្ងៃទី១៤.១៥.១៦ ខែមេសា នៃថ្ងៃបុណ្យចូលឆ្នាំខ្មែរ គ្រោះថ្នាក់ចរាចរណ៍នៅទូទាំងប្រទេស បានសម្លាប់មនុស្សចំនួន៣២នាក់ និង២៥២នាក់ទៀតរងរបួសធ្ងន់ និងស្រាល។
យោងតាមរបាយការណ៍តួលេខគ្រោះថ្នាក់ចរាចរណ៍ទូទាំងប្រទេសដែលបង្ហាញដោយអគ្គស្នងការដ្ឋាននគរបាលជាតិបានឲ្យដឹងថា នៅថ្ងៃទី១៤ ខែមេសា ឆ្នាំ២០១៤ មានគ្រោះថ្នាក់ចរាចរណ៍ នៅទាំងប្រទេស ២៥លើក (យប់ ១៦លើក), មានមនុស្សស្លាប់ ៧នាក់ និង មានមនុស្សរងរបួសស្រាល ១៧នាក់(ស្រី ៣នាក់),របួសធ្ងន់៣៤នាក់ (ស្រី ១០នាក់)។
ថ្ងៃទី១៥ ខែមេសា ឆ្នាំ២០១៤ មានគ្រោះថ្នាក់ចរាចរណ៍ នៅទូទាំងប្រទេស ៤៦លើក (យប់ ២៤លើក), មានមនុស្សស្លាប់ ១៦នាក់ និង មានមនុស្សរងរបួសស្រាល ២១នាក់(ស្រី ៤នាក់) , របួសធ្ងន់ ៦១នាក់ (ស្រី ៦នាក់)។ នៅថ្ងៃទី១៦ ខែមេសា ចំនួនមនុស្សស្លាប់ដោយចរាចរណ៍មាន៩នាក់ និងរបួស១១៩នាក់ក្នុងហេតុការណ៍កើតឡើងចំនួន៥០លើក។
ក្នុងគ្រោះថ្នាក់ចរាចរណ៍ទាំង ៤៦លើក បានបង្កឲ្យខូចខាតយានយន្តសរុប ៧៥គ្រឿង ក្នុងនោះម៉ូតូ ៦១គ្រឿង , រថយន្តធុនតូច ១២គ្រឿង, យានផ្សេងៗ ២គ្រឿង និងថ្មើរជើង៦នាក់។ គួរបញ្ជាក់ថា ចំនួនគ្រោះថ្នាក់រយៈពេល៣ថ្ងៃ ក្នុងពិធីបុណ្យចូលឆ្នាំខ្មែរ២០១៤នេះ មានចំនួនតិចជាងឆ្នាំ២០១៣ ដែលកាលពីឆ្នាំមុននោះ មានមនុស្សស្លាប់៦៧នាក់ និងរបួស៣០៣នាក់ដោយសារករណីចរាចរណ៍។
ការថយចុះនៃចំនួនមនុស្សស្លាប់និងរងរបួស ត្រូវគេនិយាយថាដោយសារតែការធ្វើយុទ្ធនាការផ្សព្វផ្សាយខ្លាំងក្លា ជុំវិញការគោរពច្បាប់ចរាចរណ៍និងសុវត្តិភាពធ្វើដំណើរនៅមុនពេលបុណ្យ ចូលឆ្នាំខ្មែរបានមកដល់៕T/L
 |
| គ្រោះថ្នាក់ចរាចរណ៍នៅក្នុងថ្ងៃបុណ្យចូលឆ្នាំខ្មែរ |
Blogger Comment
Facebook Comment