យោងតាមវេបសាយដេលីមែលចេញផ្សាយថ្ងៃទី ៧ ខែឧសភា ពលរដ្ឋអាមេរិកម្នាក់ក្នុងចំណោម ១០ នាក់គិតថា “មនុស្សក្រៅភព” ជាប់ពាក់ព័ន្ធនឹងការបាត់ខ្លួនរបស់យន្តហោះម៉ាឡេស៊ីអ៊ែរឡាញជើងហោះហើរ MH370។
ការស្ទាបស្ទង់មួយបានរកឃើញថាប្រជាជនអាមេរិក ៩ ភាគរយជឿថា “មនុស្សក្រៅភព ឬ ភាវៈមានជីវិតមកពីភពដទៃទៀតជាប់ពាក់ព័ន្ធក្នុងរឿងនេះ”។
ពួកអ្នកស៊ើបអង្កេតនៅតែបន្តការស្វែងរករបស់ខ្លួនចំពោះយន្តហោះបាត់ខ្លួននេះ និង មនុស្សចំនួន ២៣៩ នាក់ជិះលើនោះ ដែលបានបាត់ដានពីរ៉ាដាកាលពីថ្ងៃទី ៨ ខែមីនា។
 |
| យន្តហោះម៉ាឡេស៊ីអ៊ែរឡាញជើងហោះហើរ MH370 |
លទ្ធផលស្ទង់មតិនេះក៏បានរកឃើញដែរថា ប្រជាជនភាគច្រើនលើសលុប (៧៩ %) ជឿថាគ្មានអ្នកនៅរស់នោះទេ។ មនុស្សតែជាងពាក់កណ្តាលប៉ុណ្ណោះ (៥២ %) គិតថា ទីបំផុតយើងនឹងដឹងថាអ្វីបានកើតឡើងចំពោះជើងហោះហើរនេះ។ ទោះយ៉ាងណា មនុស្សចំនួន ៤៦ % និយាយថាយើងនឹងមិនដឹងនោះឡើយ។
ការស្ទាបស្ទង់នេះធ្វើឡើងខណៈភេរវករចំនួន ១១ នាក់ដែលមានទំនាក់ទំនងជាមួយពួកអាល់កៃដាត្រូវបានចាប់ខ្លួនក្នុងទីក្រុងគូឡាឡាំពួរ និង ទីក្រុងកេដា (Kedah) និងកំពុងត្រូវបានសាកសួរអំពីការជាប់ព័ន្ធក្នុងការបាត់ខ្លួនរបស់យន្តហោះនេះ។
មានអាយុចន្លោះ ២២ និង ៥៥ ឆ្នាំ ជនសង្ស័យទាំង ១១ នាក់ត្រូវគេជឿថាជានិស្សិត អ្នកជំនាញធុរកិច្ច និង អ្នកធ្វើការងារចម្លែកៗ។
អំពើភេរវកម្មត្រូវបានពលរដ្ឋអាមេរិកមើលឃើញថាជាមូលហេតុអាចទៅរួចមួយនៃការបាត់ខ្លួនយន្តហោះ ដោយប្រជាជនដែលត្រូវបានស្ទាបស្ទង់ចំនួន ៥៧ % និយាយថាពួកភេរវករទំនងជាប់ពាក់ព័ន្ធផងដែរ បើទោះបីជាមិនទាន់មានក្រុមណា ឬ ស្ថាប័នណាចេញមកទទួលខុសត្រូវនៅឡើយក៏ដោយ។
ជាងនេះទៅទៀត ៤២ % នៃសាធារណជនអាមេរិកជឿថា ពួកចាប់ពង្រត់អាចជាប់ពាក់ព័ន្ធក្នុងរឿងបាត់យន្តហោះនេះ ខណៈ ៥២ % ទៀតនិយាយថាកំហុសបច្ចេកទេសប្រហែលជាប់ពាក់ព័ន្ធ។ មនុស្សតែ ១ ភាគ ៤ ប៉ុណ្ណោះនិយាយថា អ្នកបើកយន្តហោះ និងនាវិកទំនងជាជាប់ពាក់ព័ន្ធនឹងការបាត់ខ្លួនរបស់យន្តហោះ៕
Blogger Comment
Facebook Comment