ភ្នំពេញ ៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុនិងម្នាក់ទៀតរងរបួសធ្ងន់ដោយសាររថយន្ដដឹកដីមួយគ្រឿងបើកបរលឿនពេកមកកៀរអ្នកជិះម៉ូតូពីក្រោយបណ្ដាលឲ្យដួលបោកក្បាលទៅនឹងថ្នល់ស្លាប់អ្នកអង្គុយពីក្រោយ ខណៈពេលបើកបរធ្វើដំណើរស្របទិសគ្នា តែអ្វីដែលគេហួសចិត្តនោះគឺប៉ូលិសមិនអាចតាមរករថយន្ដនោះឃើញឡើយទោះបីខំតាមទៅដល់កន្លែងការដ្ឋានជីកដីនោះហើយក្ដី មិនតែប៉ុណ្ណោះរថយន្ដធុនធំប៉ុណ្ណាប៉ុណ្ណីបែរជាបើកគេចលឿនដូចព្រួញទុកឲ្យជនរងគ្រោះស្លាប់ដោយអាសាបង់។
ហេតុការណ៍នេះបានកើតឡើងកាលពីវេលាម៉ោង១០និង៥០នាទីថ្ងៃត្រង់ថ្ងៃទី០៩ ខែឧសភា ឆ្នាំ២០១៤ នៅមុងវត្តអង្គតាគាត ស្ថិតក្នុងភូមិអង្គតាគាត សង្កាត់កន្ទោក ខណ្ឌពោធិ៍សែនជ័យតាមបណ្ដោយផ្លូវជាតិលេខ៣។ ជនរងគ្រោះដែលស្លាប់មានឈ្មោះ គង់ រីដា ភេទប្រុស អាយុ២៨ឆ្នាំ រស់នៅភូមិអំពិល ឃុំព្រែកដំបូក ស្រុកស្រីសន្ធរ ខេត្តកំពង់ចាមជាអ្នកជិះពីក្រោយ។
អ្នកបើកម៉ូតូមានឈ្មោះ ប៉េង សុខលាភ ភេទប្រុស អាយុ១៩ឆ្នាំ ស្នាក់នៅឃុំបែកចាន មានស្រុកកំណើតនៅខេត្តកំពង់ចាម។ ជនរងគ្រោះជិះម៉ូតូម៉ាកហុងដាគុបជ្រុងពណ៌ទឹកប៊ិច ពាក់ស្លាកលេខ កណ្ដាល1A-3190 ។ រីឯរថយន្ដបង្កត្រូវបានគេគ្រាន់តែដឹងថា មានពណ៌សមិនចាំស្លាកលេខជាប្រភេទរថយន្ដដឹកដី ក្រោយពេលកើតហេតុរថយន្ដបានបើកគេចខ្លួនបាត់ស្រមោល។
តាមប្រភពព័ត៌មានឲ្យដឹងថា មុនពេលកើតហេតុជនរងគ្រោះបានជិះម៉ូតូឌុបគ្នាក្នុងទិសដៅពីជើងទៅត្បូងក្នុងគោលបំណងទៅចូលរួមពិធីមង្គលការមិត្តភក្តិនៅឯខេត្តកំពត ខណៈពេលកំពុងបើកបរសុខៗមានរថយន្ដដឹកដីមួយគ្រឿងបានបើកបរយ៉ាងលឿនក្នុងទិសដៅស្របទិសគ្នា លុះមកដល់ចំណុចកើតហេតុរថយន្ដនេះបានបើកកៀរម៉ូតូបណ្ដាលឲ្យដួលបោកក្បាលទៅនឹងថ្នល់ស្លាប់អ្នកជិះពីក្រោយ។
ភ្លាមៗនោះដែររថយន្ដបង្កបានបន្ថែមល្បឿនបើកគេចខ្លួនបាត់ដោយសុវត្ថិភាពមួយរំពេចទោះបីប៉ូលិសខំប្រឹងស្វែងរកយ៉ាងណាក៏មិនឃើញដែររហូតតាមទៅរកដល់កន្លែងការដ្ឋានរណ្ដៅដីនៅឯសង្កាត់ភ្លើងឆេះរទេះក៏រកមិនឃើញផងឡាននោះហាក់ឆេះបំបាំងកាយពីភ្នែកប៉ូលិសមិនឲ្យមើលឃើញឡើយ។
នៅក្នុងខណ្ឌពោធិ៍សែនជ័យទាំងមូលគេសង្កេតឃើញរថយន្ដដឹកដីទាំងតូចទាំងធំបើកបរលឿនៗប្រដេញគ្នាតាមបណ្ដោយផ្លូវជាតិនិងបេតុងក៏ដូចផ្លូវលំក្នុងភូមិមួយចំនួនបណ្ដាលឲ្យខូចខាតជាអន្លើៗគ្មានវិធានការទប់ស្កាត់ឲ្យមានប្រសិទ្ធភាពនោះទេ៕
Blogger Comment
Facebook Comment