ប្រភព KPT
ជាទូទៅការដើរលំហែក្នុងរមណីយដ្ឋានឆ្នេរកែប ទោះជាភ្ញៀវជាតិ ឬអន្តរជាតិក៏ដោយគេតែងតែមានអារម្មណ៍ស្រស់ស្រាយ ព្រោះតែគេបានស្រង់នូវជំនោរដ៏ត្រជាក់បរិសុទ្រពីលំហសមុទ្រ កត្តាដ៏គួរឲ្យរីករាយនោះគឺគេបានអង្គុយមើលទេសភាពនៃតំបន់ភ្នំកែប ដែលមានដើមឈើពណ៌បៃតងស្រស់ ហើយការគយគន់ទិដ្ឋភាពតាមមាត់ឆ្នេរ មើលរលកសមុទ្រ និងអង្គុយមើលព្រះអាទិត្យហៀបអស្តង្គតផងដែរ។ ដោយឡែកក្រុមអាជីវករនានានៅពេលមានមនុស្សចូលមកលំហែក្នុងរមណីយដ្ឋានខេត្តកែប ដ៏ច្រើនបែបនេះមានការសប្បាយរីករាយ ដោយសារការប្រកបមុខរបរទទួលទានក៏មានភាពងាយស្រួល ហើយមុខទំនិញអ្វីក៏លក់ដាច់ដែរ។
គេបានកត់សម្គាល់ឃើញថា ក្នុងតំបន់ឆ្នេរកែបក្រៅពីការភ្លក្សនូវអាហារប្រភេទគ្រឿងសមុទ្រ ភ្ញៀវជាតិ និងអន្តរជាតិតែងតែមិនអាចភ្លេចនូវអាហារដ៏មានឱជារសជាច្រើនមុខទៀតពិសេសការទិញវត្ថុអនុស្សាវរីយ៍គ្រប់ប្រភេទដែលជាស្នាដៃតាក់តែងរបស់ប្រជាពលរដ្ឋខ្មែរ ដូចជាសម្ភារៈធ្វើអំពីសំណកសត្វសមុទ្រ មានសំបកខ្យង សំបកគ្រែងជាដើម។ ក្រុមអ្នកលក់ដូរតាមមាត់ឆ្នេរបានលើកឡើងស្របគ្នាថា ចាប់តាំងការបញ្ចប់ពិធីបុណ្យសមុទ្រ រហូតមកទល់ថ្ងៃបញ្ចប់ការងារបោះឆ្នោតក្រុមប្រឹក្សា រាជធានី ខេត្ត មនុស្សក៏ចាប់ផ្តើមសម្រុកមកកំសាន្តនៅរមណីយដ្ឋានឆ្នេរកែប កាន់តែទ្វេឡើងបើទោះជាអាកាសធាតុត្រក្តៅហែង ប៉ុន្តែក្រុមភ្ញៀវទាំងនោះបានដេកសំដិលលើវាលខ្សាច់ដ៏រំភើយទៅវិញ។
ពួកគាត់បាននិយាយទៀតថា ថ្វីត្បិតភ្ញៀវទេសចរណ៍បានបបួលគ្នាមកលេងខេត្តកែបយ៉ាងច្រើន ប៉ុន្តែភ្ញៀវមួយចំនួនពុំសូវមកអង្គុយក្នុងខ្ចុះនោះទេ ដោយគេតែងនាំគ្នាអង្គុយក្រោមម្លប់ដើមឈើតាមខឿនមាត់ឆ្នេរ ដើម្បីនាំកូនចៅពិសារអាហារទៅវិញ ហើយមឹក បង្គាឬក្តាមសេះគេច្រើនតែទៅកុម្ម៉ង់ទិញដោយខ្លួនឯង នៅតាមស្តង់តែម្តង។ ក្រុមអាជីវករបានអះអាងថា ឥឡូវមានភ្ញៀវទេសចរណ៍សម្រុកមកកំសាន្តកាន់តែច្រើនគឺមានសន្ទុះខ្លាំងជាងឆ្នាំ២០១៣ទៅទៀត។
ទាក់ទិននឹងកំណើនអ្នកទេសចរណ៍ក្នុងឆ្នាំ២០១៤នេះ លោក កែន សត្ថា អភិបាលនៃគណៈអភិបាលខេត្តកែប បានឲ្យដឹងថា បច្ចុប្បន្នខេត្តកែបបាននឹងកំពុងរីកមុខមាត់ថ្មីជាបណ្តើរៗធ្វើឲ្យមានការទទួលស្គាល់ពីសំណាក់ភ្ញៀវជាតិ និងអន្តរជាតិចូលមកសម្រាកលំហែកំសាន្ត និងស្នាក់នៅកាន់តែច្រើនឡើងពីមួយឆ្នាំទៅមួយឆ្នាំ ដោយបង្កើតបាននូវមុខរបរបង្កើនប្រភពចំណូលធ្វើឲ្យជីវភាព និងការរស់នៅរបស់ប្រជាពលរដ្ឋកាន់តែល្អប្រសើរឡើងជាលំដាប់ ហើយសង្ឃឹមថា ក្នុងពេលបច្ចុប្បន្ន និងពេលអនាគតខេត្តកែបពិតជាមុខព្រួញទេសចរណ៍ដ៏ទាក់ទាញបំផុត ដោយសារតែខេត្តមួយនេះជាខេត្តមានភាពបៃតង និងខៀវស្រងាត់ ស្តែងចេញពីធម្មជាតិពិតៗ។
យ៉ាងណាមិញខេត្តកែបដែលជារមណីយដ្ឋានមួយដ៏តូចច្រឡឹងនេះ បច្ចុប្បន្នបាននឹងកំពុងបន្តការអភិវឌ្ឍន៍ស្ទើរគ្រប់តំបន់ ពិសេសការស្ថាបនាផ្លូវថ្មី១ខ្សែ ចាប់ពីកំពង់ផែកោះទន្សាយឆ្ពោះទៅឆ្នេរអង្កោលដែលមានប្រវែងសរុបជាង១៤គីឡូម៉ែត្រនោះ ឥឡូវត្រូវបានមន្ទីរជំនាញអនុវត្តតាមគម្រោងបានប្រមាណ៨០%ហើយ ចំណែកគម្រោងសេសសល់ក៏ត្រូវបានមន្ត្រីពាក់ព័ន្ធធ្វើការពិនិត្យវាស់វែងសម្រាប់អនុវត្តផែនការបន្តទៀត ដោយសង្ឃឹមថាក្នុងពេលដ៏ខ្លីខាងមុខផ្លូវ១ខ្សែស្ថិតតាមមាត់ឆ្នេរដែលជាអំណោយរបស់រាជរដ្ឋាភិបាលនឹងបានរួចរាល់ជាស្ថាពរសម្រាប់ទុកជាចំណងដៃដល់ប្រជាពលរដ្ឋក្នុងតំបន់ ហើយក្រុមអ្នកទេសចរណ៍ក៏លែងពិបាកទៀតដែរ បើចង់ទៅលេងឆ្នេរអង្កោលពិតជាបានគយគន់ទេសភាពព្រៃកោងកាងនៅតាមមាត់ឆ្នេរយ៉ាងត្រជាក់ភ្នែកមិនខាន៕
Blogger Comment
Facebook Comment