បាត់ដំបង ៖ ចោរមួយក្រុមមានគ្នា២នាក់ស្លៀកពាក់ស៊ីវិល និងពាក់ម៉ាស់ ដោយម្នាក់កាន់AKនិងម្នាក់ទៀតកាន់កាំភ្លើងខ្លីបានធ្វើសកម្មភាពប្លន់ផ្ទះមួយកន្លែង នៅចំណុចស្ទឹងចក ស្ថិតក្នុងភូមិកកោះ ឃុំកកោះ ស្រុកម៉ោងឫស្សី ខេត្តបាត់ដំបង ហើយក្នុងករណីប្លន់នេះជនល្មើសបានបាញ់រះបណ្ដាលឲ្យស្លាប់២នាក់ និងរងរបួសធ្ងន់ម្នាក់។
ហេតុការណ៍នេះបានកើតឡើងកាលពីវេលាម៉ោង៩និង២០នាទីយប់ថ្ងៃទី២៣ ខែឧសភា ឆ្នាំ២០១៤ ហើយម្ចាស់ផ្ទះកើតហេតុមានឈ្មោះ ភុន ស្រី ភេទស្រីអាយុ៤៩ឆ្នាំ ជាស្ត្រីមេម៉ាយមានកូន៤នាក់ មានមុខរបរលក់ម្ហូបពិសេស។
សេចក្ដីរាយការណ៍បានឲ្យដឹងថា នៅក្នុងករណីប្លន់នេះ គឺជនល្មើសម្នាក់បានកាន់អាវុធAKចូលដល់ក្នុងផ្ទះកើតហេតុ រួចធ្វើការបាញ់ទៅលើបុរសម្នាក់ឈ្មោះពឿន ភារី ភេទប្រុសអាយុ៣១ឆ្នាំ មានអាសយដ្ឋាននៅស្រុកឯកភ្នំ ហើយជាគ្រូបង្រៀននៅភូមិចកតូច ដែលឧស្សាហ៍ចេញចូលមកលេងផ្ទះនេះក្នុងន័យទំនាក់ទំនងស្នេហាជាមួយកូនស្រីម្នាស់ផ្ទះ។
ក្រោយមកជនល្មើសបានប្រមូលទ្រព្យសម្បត្តិ ក្នុងនោះមានលុយខ្មែរចំនួន៤០ម៉ឺនរៀល និងខ្សែកមាសមួយខ្សែទម្ងន់៣ជី រួចក៏បានចេញពីផ្ទះហើយក្រឡេកឃើញកូនប្រុសនិងកូនស្រីរបស់ម្ចាស់ផ្ទះកំពុងដេញវាយបក្ខពួករបស់ខ្លួននៅខាងមុខផ្ទះ វាក៏បានរះបន្តទៀតបណ្ដាលឲ្យកូនប្រុសឈ្មោះសឿម ចន្នី អាយុ២២ឆ្នាំ ស្លាប់ដោយគ្រាប់កាំភ្លើងជាច្រើនគ្រាប់។
ដោយឡែកកូនស្រីឈ្មោះ សឿម ផល្លីអាយុ២៥ឆ្នាំបានរងរបួសធ្លាយពោះ និងកំពុងសង្គ្រោះនៅមន្ទីរពេទ្យ។ រីឯបក្ខពួកវាដែលកាន់កាំភ្លើងខ្លីក៏ទំនងជារងរបួសផងដែរ ដោយគ្នាវាបានដឹកម៉ូតូដែលជាមធ្យោបាយរបស់វាគេចខ្លួនចេញទៅបាត់។
បើតាមប្រភពព័ត៌មានមួយចំនួនបានបង្ហើបឲ្យដឹងថា ករណីនេះអាចពាក់ព័ន្ធនឹងស្នេហាត្រីកោណ រួមផ្សំនឹងករណីប្លន់ ដោយជនបង្កសុទ្ធតែមានវ័យប្រហែល២០ឆ្នាំ៕
Blogger Comment
Facebook Comment