រាជធានីភ្នំពេញ៖បុរសម្នាក់បានស្លាប់ភ្លាមៗនៅនឹងកន្លែងកើតហេតុដោយសារតែរថយន្តកុងតឺន័រមួយគ្រឿងបើកបុកខណៈដែលជនរងគ្រោះបើកម៉ូតូឆ្លងផ្លូវម្នាក់ឯងរីឯរថយន្តបង្ក បានព្យាយាមបើកគេចបាត់ស្រមោល កាលពីវេលាម៉ោង ៧និង២០ នាទីយប់ថ្ងៃទី២៥ ខែឧសភា ឆ្នាំ២០១៤ ស្ថិតនៅតាម បណ្តោយផ្លូវជាតិលេខ៤ ក្នុងភូមិព្រៃបឹង សង្កាត់កំបូល ខណ្ឌពោធិ៍សែនជ័យ។
ជនរងគ្រោះមានឈ្មោះ បួង ចាន់បុត្រ ភេទប្រុស អាយុ ៣៤ឆ្នាំ មានមុខរបរជា សន្តិសុខឯកជននៅរោងចក្រ GS ស្នាក់នៅក្នុងភូមិតាកេ សង្កាត់កំបូល ខណ្ឌពោធិ៍សែនជ័យ មានស្រុកកំណើតនៅភូមិភ្នៀត សង្កាត់មានជ័យ ខណ្ឌមានជ័យ ជិះម៉ូតូមួយគ្រឿង ម៉ាកសេ១២៥ ពណ៌ខ្មៅ សេរីឆ្នាំ២០១៤ ពាក់ស្លាកលេខ ភ្នំពេញ 1CI-9765 រីឯរថយន្តបង្ក ម៉ាកកុងតឺន័រ ពុំត្រូវបានគេចាំម៉ាក និងស្លាកលេខនោះទេ ក្រោយពេលកើតហេតុ បានព្យាយាមបើកគេចខ្លួនបាត់។
មុនពេលកើតហេតុ រថយន្តបង្កបានបើកបរ ក្នុងទិសដៅពីកើតទៅលិច ក៏ជ្រុលទៅបុកម៉ូតូជនរងគ្រោះ កំពុងតែបើកឆ្លងផ្លូវ អូសជាច្រើនម៉ែត្រ បណ្ដាលឲ្យជនរងគ្រោះ ដាច់ខ្យល់ស្លាប់ភ្លាមៗតែម្តង រីឯរថយន្តបង្កវិញ បានព្យាយាមបើក ទៅទិសខាងលិចបាត់ស្រមោល។ ក្រោយពេលកើតហេតុ នគរបាលបានចុះទៅ ជួយអន្តរាគមន៍ជាបន្ទាន់ផងដែរ ប៉ុន្តែបានត្រឹមតែ ធ្វើការវាស់វែងដើម្បីស្រាវជ្រាវរករថយន្តបង្ក មកដោះស្រាយជាមួយ គ្រួសារជនរងគ្រោះ៕
Blogger Comment
Facebook Comment