កណ្ដាល៖ ដោយសារតែអត់មានលុយចាយវាយបានធ្វើឲ្យយុវជនម្នាក់ក្លែងខ្លួនជាព្រះសង្ឃក្នុងគោលបំណងដើរបិណ្ឌបាតពីប្រជាពលរដ្ឋ តែត្រូវបានអស់លក្ខណ៍ ខណៈដែលជិះម៉ូតូចូលវត្តក្រពើហាក្នុងគោលបំណងប្ដូរសំលៀកបំពាក់ ហើយបានជួបជាមួយសមត្ថកិច្ច ក៏ត្រូវបានសមត្ថកិច្ចតាមចាប់ខ្លួនបានតែម្តង។ យុវជនខាងលើត្រូវបានសមត្ថកិច្ចឃាត់ខ្លួនបានកាលពីវេលាម៉ោង៦ និង ២៣នាទី ថ្ងៃទី០៦ ខែវិច្ឆិកា ឆ្នាំ២០១៣ នៅលើកំណាត់ផ្លូវ មួយខ្សែខាងមុខក្លឹបហាត់ប្រាណ wellthy clup ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល។មន្ត្រីនគរបាលក្រុងតាខ្មៅបានឲ្យដឹងថា យុវជនដែលបម្រុងតែខ្លួនជាព្រះសង្ឃនោះមានឈ្មោះ តោ សុវណ្ណ អាយុ២១ឆ្នាំ បច្ចុប្បន្នស្នាក់នៅម្តុំវត្តស្ទឹងមានជ័យ ខណ្ឌមានជ័យ រាជធានីភ្នំពេញ។មន្ត្រីនគរបាលខាងលើបន្តថា នៅវេលាម៉ោងប្រមាណ៦ព្រឹកថ្ងៃទី០៦ ខែវិច្ឆិកា ឆ្នាំ២០១៣ កម្លាំងនគរបាលបានប្រទះឃើញមានបុរស០២នាក់ជិះម៉ូតូមួយគ្រឿងម៉ាកហុងដា សេ១១០ ចូលទៅក្នុងវត្តក្រពើហា ស្ថិតក្នុងសង្កាត់ព្រែកឫស្សី ក្រុងតាខ្មៅ ។
នៅគ្រាដែលបុរសទាំង០២នាក់បានឃើញសមត្ថកិច្ចក៏នាំគ្នាប្រញាប់ប្រញាល់ជិះម៉ូតូគេចចេញពីក្នុងវត្តភ្លាមៗនោះកម្លាំងនគរបាលមានការសង្ស័យក៏បានជិះម៉ូតូដេញតាមពីក្រោយ។ លុះដល់ចំណុចខាងមុខក្លឹបហាត់ប្រាណ wellthy clupស្ថិតក្នុងភូមិតាខ្មៅ សង្កាត់តាខ្មៅ យុវជនម្នាក់ដែលជិះនៅខាងក្រោយបានធ្លាក់ពីលើម៉ូតូ ក៏ត្រូវបាននគរបាលឃាត់ខ្លួនឆែកឆេរឃើញមានស្បង់ជីវនៅក្នុងខោ ក៏សម្រេចនាំយកទៅកាន់វត្តក្រពើហាដើម្បីឲ្យព្រះចៅអធិការវត្តផ្សឹក។មន្ត្រីនគរបាលបានបន្តថា ក្រោយពីធ្វើពិធីផ្សឹករួចមកសមត្ថកិច្ចនគរបាលបានធ្វើការសាកសួរទើបដឹងថាយុវជនខាងលើក្លែងខ្លួនជាព្រះសង្ឃក្នុងគោកបំណងដើរបិណ្ឌបាតពីប្រជាពលរដ្ឋ ដើម្បីយកលុយចាយវាយ គឺគេមិនមែនជាព្រះសង្ឃពិតប្រាកដនោះឡើយ។ជនសង្ស័យបានសារភាពប្រាប់សមត្ថកិច្ចថា នៅវេលាម៉ោងប្រមាណ៥ព្រឹក រូបគេបានជួលម៉ូតូឌុបជិះពីភ្នំពេញសំដៅមកក្រុងតាខ្មៅ ក្នុងគោលបំណងក្លែងខ្លួនជាព្រះសង្ឃដើរបិណ្ឌបាត ដោយបានជួលម៉ូតូឌុបក្នុងតម្លៃ៣ម៉ឺនរៀល។ ពេលជិះមកដល់វត្តក្រពើហារូបគេបានឲ្យម៉ូតូឌុបៗចូលទៅក្នុងវត្តដើម្បីដោះខោអាវចេញ រួចគ្រងស្បង់ជីវដើរបិណ្ឌបាត ខណៈពេលនោះក៏បានជួបជាមួយនគរបាលធ្វើឲ្យគេមានការភិតភ័យយ៉ាងខ្លាំងក៏ប្រញាប់ប្រញាល់ឲ្យម៉ូតូឌុបជិះចេញពីវត្ត នៅគ្រាជិះដល់ចំណុចកើតហេតុក៏បានធ្លាក់ពីលើម៉ូតូដោយសារតែផ្លូវជង្ហុកពេក ហើយក៏ត្រូវបាននគរបាលឃាត់ខ្លួនតែម្តង៕
មុន្នី
Blogger Comment
Facebook Comment