ភំ្នពេញៈ ចែមុំ ថៅកែហាងកែសម្ផស្សមីកាហ្សា ល្បីឈ្មោះ ក្នុងខណ្ឌដូនពេញ ដែលត្រូវបានចាប់ខ្លួនកាលពីឆ្នាំមុន ត្រូវបានសាលាឧទ្ធរណ៍បើកសវនាការជំនុំជម្រះនៅថ្ងៃព្រហស្បតិ៍នេះ ពីបទអន្តររវាងបុរស ឬស្រ្តីពេស្យា និងសញ្ចារិក ឬសញ្ចារិកា តាមមាត្រា ២៨៥ នៃក្រមព្រហ្មទណ្ឌ។
ប្រធានក្រុមប្រឹក្សាជំនុំជម្រះ លោកស្រី ចាន់ ម៉ាឌីណា បានថ្លែងថា ចាន់ស្រីណុច ហៅចែមុំ (ស្រី) អាយុ ២៩ឆ្នាំ ម្ចាស់ហាងកែសម្ផស្សមីកាហ្សា ក្នុងខណ្ឌដូនពេញ ជាប់ចោទ ពីបទអន្តររវាងបុរស ឬស្រ្តីពេស្យា និងសញ្ចារិក ឬសញ្ចារិកា។
ថៅកែហាងកែសម្ផស្ស មីកាហ្សារូបនេះ ត្រូវបានកងរាជអាវុធហត្ថលើផ្ទៃប្រទេស និងព្រះរាជអាជ្ញាសាលាដំបូងរាជធានីភំ្នពេញ ចុះបង្ក្រាប និងចាប់ខ្លួន រួមនិងមនុស្សស្រី ៤ នាក់ទៀត កាលពីយប់ថ្ងៃទី ១៩ ខែកញ្ញា ឆ្នាំ ២០១២ នៅផ្ទះសំណាក់ស្រែលាភ ពីបទជួញដូរផ្លូវភេទ។
សាលាដំបូងរាជធានី បានបើកសវនាការជំនុំជម្រះ និងប្រកាសសាលក្រមចុះថ្ងៃទី១២ ខែមីនា ឆ្នាំ២០១៣ សម្រេចផ្តន្ទាទោស ចាន់ ស្រីណុច ហៅចែមុំ អាយុ ២៨ ឆ្នាំ ឲ្យជាប់ពន្ធនាគារ ៤ឆ្នាំ៦ខែ តែអនុវត្តទោសក្នុងពន្ធនាគារ ៣ឆ្នាំ៦ខែ ក្រៅពីនោះត្រូវព្យួរ ពីបទសញ្ចារកម្ម។តែការសម្រេចនេះត្រូវជនជាប់ចោទប្តឹងឧទ្ធរណ៍។
ក្នុងសវនាការ ចែមុំ បានច្រានចោលបទចោទ ថាខ្លួនមិនបានប្រព្រឹត្តដូចការចោទទេ តាមពិតនៅថ្ងៃនោះ ហេង ដាលិស ពឹងខ្លួនឲ្យជូនទៅជួបមិត្តភ័ក្តិ ពេលទៅដល់ផ្ទះសំណាក់ស្រែលាភ ត្រូវសមត្ថកិច្ចចាប់ខ្លួនតែម្តង។
សាលដីកាលើសំណុំរឿងជំនុំជម្រះថ្ងៃនេះ នឹងប្រកាសនៅថ្ងៃទី ២៥ ខែវិច្ឆិកាខាងមុខ។
សូមរង់ចាំអានព័ត៌មានពិស្តារក្នុងកាសែតភ្នំពេញប៉ុស្តិ៍
ចែមុំ ថៅកែហាងកែសម្ផស្សមីកាហ្សា ល្បីឈ្មោះពេលនាំមកសវនាការសាលាដំបូងរាជធានីភ្នំពេញ។ រូបថត ហុង មិនា
Blogger Comment
Facebook Comment