ភ្នំពេញ: គណៈកម្មាធិការជាតិសុវត្ថិភាពចរាចរណ៍ផ្លូវគោក បានព្រមានថា អ្នកបើកបរម៉ូតូ គ្មានប័ណ្ណបើកបរ ត្រូវពិន័យ ៦ ម៉ឺនរៀល ខណៈអ្នកបើកបរម៉ូតូ ដែលមានប័ណ្ណបើកបរ មានចំនួនតែ ១៦ ម៉ឺននាក់ ក្នុងពេលម៉ូតូកំពុងធ្វើចរាចរ នៅលើផ្លូវសាធារណៈ មានរហូតដល់ទៅ ២០៥ ម៉ឺនគ្រឿង។ គណៈកម្មាធិការជាតិមួយនេះ ក៏អះអាងថា អ្នកបើកបរ ភាគច្រើន គ្មានប័ណ្ណបើកបរ បានន័យថា មិនបានឆ្លងកាត់ សាលារៀនបើកបរ មិនចេះច្បាប់ចរាចរ គឺចេះតែបើកបរ បង្កឲ្យមានគ្រោះថ្នាក់ច្រើន រាល់ថ្ងៃ។
លោកព្រាប ច័ន្ទវិបុល ប្រធានផ្នែកអប់រំច្បាប់ចរាចរណ៍ផ្លូវគោក នៃគណៈកម្មាធិការជាតិ សុវត្ថិភាពចរាចរណ៍ផ្លូវគោក និងជាប្រធាននាយកដ្ឋានដឹកជញ្ជូនផ្លូវគោក បានឲ្យដឹងថា អ្នកបើកបរម៉ូតូ ភាគច្រើន គឺមិនទាន់មានប័ណ្ណបើកបរ ជាហេតុបង្កនាំឲ្យមានគ្រោះថ្នាក់ច្រើន រាល់ថ្ងៃ។ បញ្ហាអ្នកបើកបរម៉ូតូ គ្មានប័ណ្ណបើកបរនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក កំពុងតែរៀបចំវិធានការ ធ្វើយ៉ាងណាឲ្យអ្នកបើកបរ ដែលមិនទាន់មានប័ណ្ណបើកបរនោះ ទៅប្រឡងយកប័ណ្ណបើកបរ បន្ទាប់ពីគេបានរៀនច្បាប់ចរាចររួច។
ប្រភពខាងលើ បានឲ្យដឹងទៀតថា តាមច្បាប់ចរាចរណ៍ផ្លូវគោក អ្នកបើកបរ ដោយគ្មានប័ណ្ណបើកបរ ត្រូវទទួលរងការផាកពិន័យ ជាប្រាក់ ឬជាប់ពន្ធនាគារ។ តែដោយសារអ្នកបើកបរម៉ូតូ ភាគច្រើន មិនទាន់មានប័ណ្ណបើកបរ យើង(ព្រាប ច័ន្ទវិបុល) បានស្នើឲ្យអនុវត្តត្រឹមតែផាកពិន័យ តាមច្បាប់ថ្មីសិន ចាំដល់អ្នកបើកបរម៉ូតូ ភាគច្រើន មានប័ណ្ណសិន ចាំអនុវត្តការបញ្ជូនទៅតុលាការ។
តាមប្រភពដដែល បានឲ្យដឹងទៀតថា ម៉ូតូដែលកំពុងធ្វើចរាចរ លើផ្លូវសាធារណៈ សព្វថ្ងៃនេះ មានចំនួនរហូតដល់ទៅប្រមាណជា ២០៥ ម៉ឺនគ្រឿង(ជាងពីរលាន) តែអ្នកបើកបរម៉ូតូ មានប័ណ្ណបើកបរ តែជាង ១៦ ម៉ឺននាក់ទេ។ សព្វថ្ងៃនេះ នៅមានអ្នកបើកបរម៉ូតូ មកប្រឡងយកប័ណ្ណបើកបរ តែមិនច្រើនទេ ក្នុងមួយខែ បានតែប្រហែលជាពី ២.០០០ ទៅ ៣.០០០ នាក់ ក្នុងពេលដែលម៉ូតូចុះបញ្ជីថ្មី មានចំនួនដល់ប្រមាណជា ពីរម៉ឺនគ្រឿង ក្នុងមួយខែនោះ។
អ្នកបើកបរម៉ូតូ មិនព្រមនាំគ្នា មករៀនច្បាប់បើកបរ គឺមកពីនគរបាល មិនបានធ្វើការត្រួតពិនិត្យ ការអនុវត្តច្បាប់ចរាចរ។
លោកព្រាប ច័ន្ទវិបុល បានបញ្ជាក់ ដោយយោងតាមរបាយការណ៍ថា គ្រោះថ្នាក់ចរាចរ សព្វថ្ងៃនេះ ភាគច្រើន បង្កឡើងពីអ្នកប្រើប្រាស់ម៉ូតូ ដែលបានបើកបរ ប្រសេចប្រសាចពេញផ្លូវ មិនប្រកាន់ស្តាំ មិនគោរពស្លាកសញ្ញា បណ្តាលឲ្យមានគ្រោះថ្នាក់ ដល់អ្នកដទៃ។ នេះដោយសារតែអ្នកទាំងនោះមិនចេះច្បាប់ចរាចរ។ ចង់កាត់បន្ថយបាននូវគ្រោះថ្នាក់ចរាចរ ត្រូវតែពង្រឹងការអនុវត្តច្បាប់។
មន្ត្រីខាងលើ បានបន្តទៀតថា ប្រសិនបើអនុវត្តត្រឹមតែផាកពិន័យតាមច្បាប់ថ្មី ជំនួសការដាក់ពន្ធនាគារនោះ អ្នកបើបរម៉ូតូ គ្មានប័ណ្ណបើកបរ ត្រូវប្រឈមនឹងការពិន័យជាប្រាក់ចំនួន ៦ ម៉ឺនរៀល។ បើនគរបាលអនុវត្តតាមច្បាប់ថ្មីនេះ អ្នកបើកបរម៉ូតូគ្មានប័ណ្ណភាគច្រើន ប្រាកដជានាំគ្នា មកប្រឡងយកប័ណ្ណបើកបរ បន្ទាប់ពីបានឆ្លងកាត់ការរៀនច្បាប់បើកបររួច បើមិនដូច្នេះទេ គេ(អ្នកបើកបរគ្មានប័ណ្ណ) មិននាំគ្នាមករៀនច្បាប់ចរាចរ ដើម្បីប្រឡងយកប័ណ្ណបើកបរឡើយ៕V/L
ម៉ូតូបុកគ្នានៅចំកណ្តាលទ្រូងផ្លូវធំល្វឹងល្វើយដោយសារតែមិនប្រកាន់ស្តាំ
Blogger Comment
Facebook Comment