ភ្នំពេញ: លោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានជូនដំណឹងថា ក្រសួងអប់រំ យុវជន និងកីឡា សហការជាមួយស្ថាប័នមានសមត្ថកិច្ច នឹងចុះតាមទីផ្សារ បណ្ណាគារ និងតូបលក់សៀវភៅនានា ដើម្បីរឹបអូស យកសៀវភៅសិក្សាគោល ឬសៀវភៅពុម្ព ដែលមានសរសេរនៅលើក្របថា “ហាមលក់” និង “កម្មសិទ្ធិរបស់រដ្ឋ” ដោយពុំមានទូទាត់ប្រាក់សំណងអ្វីឡើយ ហើយជនល្មើសទាំងអស់ ត្រូវប្រឈមនឹងការដាក់ទោសតាមច្បាប់ជាធរមាន។ វិធានការរឹបអូសនោះ ត្រូវអនុវត្ត ចាប់ពីថ្ងៃទី៣១មករាតទៅ។
សេចក្តីជូនដំណឹង ចុះថ្ងៃទី៣១ ខែមករា ឆ្នាំ២០១៤ ចុះហត្ថលេខាដោយលោក ហង់ ជួន ណារ៉ុន លើកឡើងថា ទោះបីជាកន្លងមក ក្រសួង បានចេញសេចក្តីណែនាំ សេចក្តីជូនដំណឹង និងបោះពុម្ពផ្សាយផ្ទាំងរូបភាពផ្សេងៗ ដែលមានខ្លឹមសារទប់ស្កាត់ការលក់-ទិញសៀវភៅសិក្សាគោល ដែលមានសរសេរនៅក្របថា “ហាមលក់” និង “កម្មសិទ្ធិរបស់រដ្ឋ” យ៉ាងណាក៏ដោយ ក៏បច្ចុប្បន្ន ក្រសួងសង្កេតឃើញថា សៀវភៅសិក្សាគោលប្រភេទនេះ នៅមានដាក់លក់តាមទីផ្សារ បណ្ណាគារ និងតូបលក់សៀវភៅនានា ក្នុងរាជធានីភ្នំពេញ និងតាមបណ្តាខេត្តមួយចំនួនទៀតផង។
ក្រសួងអប់រំ យុវជន និងកីឡា បានបញ្ជាក់ឡើងវិញថា ការលក់-ទិញ សៀវភៅសិក្សាគោល ដែលមានសរសេរនៅលើក្របថា “ហាមលក់” និង “កម្មសិទ្ធិរបស់រដ្ឋ” គឺជាអំពើខុសច្បាប់ បង្កឲ្យមានផលអវិជ្ជមាន ដល់ការងារអប់រំយ៉ាងខ្លាំង។ អាស្រ័យហេតុនេះ សូមអាជីវករ និងសាធារណជនទាំងអស់ មេត្តាជ្រាប និងឈប់លក់-ទិញ សៀវភៅសិក្សាគោល ដែលមានសរសេរនៅលើក្របថា “ហាមលក់” និង “កម្មសិទ្ធិរបស់រដ្ឋ” ជាបន្ទាន់។
ក្នុងសេចក្តីជូនដំណឹងដដែល ក៏បានគូសបញ្ជាក់ជាចុងក្រោយថា អាជីវករ និងសាធារណជនទាំងអស់ អាចរកទិញដុំ និងរាយ ដោយស្របច្បាប់នូវសៀវភៅសិក្សាគោល ដែលមានសរសេរលើក្របមុខថា “សម្រាប់លក់” នៅបណ្ណាគារ គ.ប.ច. នៃគ្រឹះស្ថានបោះពុម្ព និងចែកផ្សាយ ដែលមានអាសយដ្ឋាន អគារលេខ ១៤៨ មហាវិថីព្រះនរោត្តម រាជធានីភ្នំពេញ ( ទូរស័ព្ទលេខ 023 63 63 033 ) រៀងរាល់ពេលម៉ោងធ្វើការ ព្រមទាំងនៅតាមទីផ្សារ បណ្ណាគារ និងតូបលក់សៀវភៅនានា ក្នុងទូទាំងប្រទេស។
ជាការកត់សម្គាល់ វិធានការរបស់រដ្ឋមន្ត្រីក្រសួងអប់រំ ខាងលើនេះ បានធ្វើឡើង បន្ទាប់ពីវិទ្យាស្ថានខ្មែរ សម្រាប់អភិវឌ្ឍន៍ជាតិ និងសម្ព័ន្ធគណនេយ្យភាពអាស៊ីបូព៌ា និងប៉ាស៊ីហ្វិក បានចេញសេចក្តីថ្លែងការណ៍រួម ស្តីពី កង្វះខាតក្នុងអភិបាលកិច្ច នាំឲ្យបាត់បង់សៀវភៅសិក្សាគោល។ សេចក្តីថ្លែងការណ៍រួមចុះថ្ងៃទី២៦ ខែធ្នូ ឆ្នាំ២០១៣ បានបង្ហាញថា សៀវភៅសិក្សាគោល ដែលសរសេរនៅក្របថា “ហាមលក់” និង “កម្មសិទ្ធិរបស់រដ្ឋ” នៅតែបន្តលក់តាមផ្សារ បណ្ណាគារ និងតូបលក់សៀវភៅ។
ការបន្តលក់ដូរសៀវភៅសិក្សាគោលរបស់រដ្ឋនោះ ត្រូវបានអង្គការក្រៅរដ្ឋាភិបាលទាំងពីរ សិក្សាស្រាវជ្រាវ នៅរវាងខែមករា និងខែកុម្ភៈ ឆ្នាំ២០១៣ លើកគម្រោងរបស់ធនាគារអភិវឌ្ឍន៍អាស៊ី EEQP/ADB ក្នុងទឹកប្រាក់ចំនួន ១.៣៤៦.០០០ ដុល្លារអាមេរិក ដែលបានផ្តល់ឲ្យក្រសួងអប់រំ យុវជន និងកីឡា សម្រាប់ការបោះពុម្ព និងចែកចាយ សៀវភៅសិក្សាគោល ដល់សិស្សានុសិស្ស កម្រិតសិក្សាទុតិយភូមិ នៅឆ្នាំ២០១២-២០១៣៕
Blogger Comment
Facebook Comment