ភ្នំពេញ: ម៉ូតូកង់បី និងម៉ូតូរ៉ឺម៉ក កំពុងធ្វើចរាចរ នៅលើផ្លូវសាធារណៈ ក្នុងទីក្រុងភ្នំពេញ សព្វថ្ងៃ មានចំនួនដល់ប្រមាណជាមួយម៉ឺនគ្រឿងហើយ និងបន្តកើនឡើងរាល់ថ្ងៃ ចេញពីសិប្បកម្មកែច្នៃ ជាង៤០កន្លែង និងមួយចំនួន នាំចូលមកពីក្រៅប្រទេស។
លោកព្រៀប ចាន់វិបុល ប្រធាននាយកដ្ឋានដឹកជញ្ជូនផ្លូវគោក នៃក្រសួងសាធារណការ បាននិយាយឲ្យដឹង នៅថ្ងៃទី១១ ខែកុម្ភៈ ឆ្នាំ២០១៤ថា ម៉ូតូកង់បី និងម៉ូតូរ៉ឺម៉ក នៅរាជធានីភ្នំពេញ សព្វថ្ងៃនេះ មានចំនួនច្រើន និងកើនឡើង រាល់ថ្ងៃ ធ្វើឲ្យចរាចរ ជួបបញ្ហាកាន់តែលំបាក ដោយសារអ្នកបើកបរ យានយន្តទាំងពីរប្រភេទនេះ គ្មានសណ្តាប់ធ្នាប់ និងមិនយល់ពីច្បាប់ចរាចរណ៍។
ប្រភពខាងលើ បានឲ្យដឹងទៀតថា ចរាចរណ៍ នៅក្នុងទីក្រុង ដែលកាន់តែអាក្រក់ទៅ សព្វថ្ងៃនេះ គឺដោយសារតែម៉ូតូកង់បី និងម៉ូតូរ៉ឺម៉ក។ ម៉ូតូកង់បី និងម៉ូតូរ៉ឺម៉ក មានចុះបញ្ជី តែនៅភ្នំពេញ និងខេត្តសៀមរាប ហើយថ្មីៗនេះ បានអនុញ្ញាតឲ្យនៅខេត្តព្រះសីហនុមួយទៀត។
ម៉ូតូកង់បី និងម៉ូតូរ៉ឺម៉ក មានចំនួនកើនឡើង រាល់ថ្ងៃនេះ គួរដល់ពេលត្រូវធ្វើការទប់ស្កាត់ ការផលិត ការនាំចូលហើយ។
លោកជា ប៊ុនធឿន ប្រធានអង្គភាពចុះបញ្ជីទោចក្រយានយន្ត នៃមន្ទីរសាធារណការរាជធានីភ្នំពេញ បាននិយាយឲ្យដឹងនៅថ្ងៃទី១១ ខែកុម្ភៈ ឆ្នាំ២០១៤ថា ម៉ូតូកង់បី ដែលបានចុះបញ្ជីត្រឹមត្រូវមានចំនួន ២.៨៩០ គ្រឿង និងម៉ូតូរ៉ឺម៉ក មានចំនួន ៥.៣៦៥ គ្រឿង។
ពេលនេះ ក្នុងមួយថ្ងៃមានម៉ូតូកង់បី និងម៉ូតូរ៉ឺម៉ក ប្រមាណជា ១០ គ្រឿង បានមកចុះបញ្ជី ។ តាមការប៉ាន់ស្មាន យានយន្តទាំងពីរប្រភេទនេះមានមិនតិចជាងមួយម៉ឺនគ្រឿងទេ។
ម៉ូតូកង់បី និងម៉ូតូរ៉ឺម៉ក ដែលកំពុងធ្វើចរាចរ នៅលើផ្លូវក្នុងទីក្រុង សព្វថ្ងៃនេះ ត្រូវបានប្រភពខាងលើ បញ្ជាក់ថា មានចំនួនច្រើនលើសលប់ ហើយនិងបង្កបញ្ហាស្មុគស្មាញខ្លាំងណាស់នៅលើផ្លូវសាធារណៈ។
ម៉ូតូកង់បីមួយចំនួន នាំចូល និងមួយចំនួន ផលិតនៅក្នុងស្រុក ជាមួយនឹងម៉ូតូរ៉ឺម៉ក នៅតាមសិប្បកម្ម ជាង៤០កន្លែង នៅរាជធានីភ្នំពេញ។ ម៉ូតូកង់បី និងម៉ូតូរ៉ឺម៉ក ដែលគេបានផលិតរួចហើយ ត្រូវតែផ្តល់ស្លាកលេខឲ្យគេ ដើម្បីគ្រប់គ្រង តែគួរដល់ពេលត្រូវទប់ស្កាត់ នៅកន្លែងផលិតហើយ។ អង្គភាព បានស្នើទៅសាលារាជធានី ម្តងរួចមកហើយ ឲ្យធ្វើការទប់ស្កាត់ការផលិត តែមិន ទាន់មានចម្លើយត្រឡប់មកវិញទេ។
លោកហេង ចាន់ធារី ស្នងការរងនគរបាល រាជធានីភ្នំពេញ ទទួលផែនចរាចរ បាននិយាយដោយទទួលស្គាល់នៅថ្ងៃនេះដែរថា ចំពោះម៉ូតូកង់បី និងម៉ូតូរ៉ឺម៉ក ដែលធ្វើ ចរាចរ មិនគោរពច្បាប់ច្រើនជាងគេ សព្វថ្ងៃនេះ មិនដឹងថា ត្រូវគ្រប់គ្រងបែបណាទេ ។
បញ្ហាកកស្ទះសព្វថ្ងៃ កើតឡើងច្រើន គឺដោយសារយានទាំងពីរប្រភេទនេះ។ ម៉ូតូកង់បី គេមានសមាគម ពេលដែលគេខុស ហើយសមត្ថកិច្ចឃាត់ទុក គេតែងលើកគ្នាមកតវ៉ា ។
ការអនុវត្តច្បាប់(ចរាចរ)ដែលម្តងធូរ ម្តងតឹង ទៅតាមសភាពការណ៍នយោបាយ ធ្វើឲ្យមនុស្សមិនគោរពច្បាប់។ អ្នកមិនគោរពច្បាប់ គឺមិនដែលគាំទ្រដល់រាជរដ្ឋាភិបាលទេ។ នៅពេលការគោរពច្បាប់ មិនសូវមានការកកស្ទះ និងគ្រោះថ្នាក់ចរាចរ កើតមានឡើងច្រើន ធ្វើឲ្យប៉ះពាល់ដល់សណ្តាប់ធ្នាប់ និងសេដ្ឋកិច្ចសង្គម ក៏ច្រើនដែរ៕V/s
.jpg)
.jpg)
Blogger Comment
Facebook Comment