ភ្នំពេញ: ក្រសួងសុខាភិបាល បានផ្សព្វផ្សាយជាសាធារណៈ នូវសារាចរមួយ កាលពីថ្ងៃទី១១ ខែកុម្ភៈ ឆ្នាំ២០១៤ដោយហាមជក់បារី នៅកន្លែងធ្វើការ និងទីសាធារណៈ ដើម្បីជាការកាត់បន្ថយនូវហានិភ័យ ចំពោះសុខភាពរបស់ប្រជាពលរដ្ឋ ក្រោមការប្រឹងប្រែងរបស់ក្រសួសុខាភិបាល អង្គសុខភាពពិភពលោក និងអង្គការចលនាកម្ពុជាដើម្បីសុខភាព (CMH)។
នៅក្នុងសារាចរ ស្តីពីវិធានការហាមឃាត់ការជក់ និងការបង្ហុយផ្សែងផលិតផលថ្នាំជក់នៅកន្លែងធ្វើការ និងកន្លែងសាធារណៈ បានចែងថាៈ “ ការជក់ ឬការបង្ហុយផ្សែង ផលិតផលថ្នាំជក់ នៅតាមកន្លែងធ្វើការ គ្រឹះស្ថានឧត្តមសិក្សា កន្លែងសាធារណៈ កន្លែងអគារសាធារណៈចំហ កន្លែងអគារសាធារណៈបិទជិត មធ្យោបាយដឹកជញ្ជូនសាធារណៈ និងនៅក្នុងបរិវេណគ្រឹះស្ថានសុខាភិបាល គ្រឹះស្ថានសិក្សា ទារកដ្ឋាន សួនកុមារ គ្រឹះស្ថានសាសនា សារមន្ទីរ រមណីយដ្ឋានវប្បធម៌ប្រវត្តិសាស្ត្រ ស្ថានីយ៍ប្រេងឥន្ធនៈ និងកន្លែងងាយឆាបឆេះ ត្រូវហាមឃាត់”។
.jpg)
របាយការណ៍ដែលជាលទ្ធផលស្រាវជ្រាវ របស់ក្រសួងផែនការ ឆ្នាំ២០១១ បានឱ្យដឹងថា ប្រជាពលរដ្ឋកម្ពុជា ជិត ៩០ ភាគរយ កំពុងស្រូបផ្សែងបារីពីគេ នៅតាមភោជនីយដ្ឋាន និងអាហារដ្ឋាន, ៦០ ភាគរយ នៅតាមមធ្យោបាយធ្វើដំណើរសាធារណៈ និងជិត ៥០ ភាគរយ នៅកន្លែងធ្វើការ។
នៅប្រទេសកម្ពុជា ជារៀងឆ្នាំ មានមនុស្សស្លាប់ដោយសារជំងឺ ទាក់ទងនឹងការប្រើប្រាស់ថ្នាំជក់ ចំនួនមួយម៉ឺននាក់ ឬ ប្រមាណជា ៣០ នាក់ ក្នុងមួយថ្ងៃ។
លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល បានលើកឡើថា “ ទឹកប្រាក់ជិត ១០០ លានដុល្លារអាមេរិក ត្រូវបានចំណាយ ទៅលើការទិញថ្នាំជក់ ក្នុងមួយឆ្នាំៗ។
ថ្នាំជក់ គឺជាមូលហេតុចម្បង ដែលនាំឱ្យកើតជំងឺមហារីក ហើយតាមលទ្ធផលនៃការវិភាគបឋម របស់មន្ទីរពេទ្យមិត្តភាព ខ្មែរ-សូវៀត(ពេទ្យរុស្ស៊ី) បានបង្ហាញថា ការចំណាយទៅលើការព្យាបាល ជំងឺមហារីកមួយករណី ត្រូវចំណាយថវិកាជាមធ្យម មួយម៉ឺនដុល្លារអាមេរិក។ នេះបានសេចក្តីថា ការចំណាយទៅលើកការព្យាបាលជំងឺ ដែលបង្កឡើងដោយថ្នាំជក់ មានទំហំធំធេង ជាងចំនួនទឹកប្រាក់ (១០០ លានដុល្លារ) ដែលប្រើសម្រាប់ទិញថ្នាំជក់” ។
លោកវេជ្ជបណ្ឌិត ភីធឺ ជីអឹម វ៉ាន់ម៉ារ៉ែន តំណាងអង្គការសុខភាពពិភពលោកនៅកម្ពុជា បានលើកឡើងថា ជារៀងរាល់ឆ្នាំ ថ្នាំជក់បានសម្លាប់មនុស្ស ៦ លាននាក់ ទូទាំងពិភពលោក ដែលក្នុងនោះ មានមនុស្ស ៦ សែននាក់ ស្លាប់ដោយសាររងនូវការស្រូបផ្សែងបារីពីគេ។ ប្រសិនបើគ្មានវិធានការ ដ៏មានប្រសិទ្ធភាព ក្នុងការត្រួតពិនិត្យថ្នាំជក់ទេ ចំនួននៃការស្លាប់ ដែលបណ្តាលមកពីការប្រើប្រាស់ថ្នាំជក់នេះ នឹងកើនឡើងដល់ ៨ លាននាក់ គិតត្រឹមឆ្នាំ២០២៣។
ប្រទេសកម្ពុជា មានរួចមកហើយនូវអនុក្រឹត្យ ស្តីពីវិធានការចំពោះ ការហាមឃាត់ការផ្សាយពាណិជ្ជកម្ម ផលិតផលថ្នាំជក់ និងអនុក្រឹត្យ ស្តីពីការបោះពុម្ពសារ ព្រមានសុខភាព លើកញ្ចប់បារី ។ ដូច្នេះ បូកបន្ថែមដោយសារាចរ ស្តីពីវិធានការហាមឃាត់ការជក់ និងការបង្ហុយផ្សែង ផលិតផលថ្នាំជក់ នៅកន្លែងធ្វើការ និងកន្លែងសាធារណៈ នេះមួយទៀត កម្ពុជា មានវិធានការចំនួនបីហើយ។
នៅប្រទេសព្រុយណេ ម៉ាឡេស៊ី ហ្វីលីពីន សឹង្ហបូរី ថៃ និងប្រទេសវៀតណាម មានគោលនយោបាយ និងបទបញ្ញត្តិហាមឃាត់ការជក់បារីប្រកបដោយប្រសិទ្ធភាព។
នៅក្នុងសារាចរ ដែលមាន ៧ ចំណុចនេះ បានតម្រូវឱ្យអ្នកគ្រប់គ្រង ឬម្ចាស់កន្លែងធ្វើការ កន្លែងសាធារណៈ ឱ្យដាក់បម្រាមជក់បារី ហើយអ្នកគ្រប់គ្រង ឬម្ចាស់ទាំងនោះ ត្រូវអប់រំណែនាំមិនឱ្យជក់ ចំពោះជនណា មិនអនុវត្តតាម បម្រាមនៃការហាមជក់ ឬការបង្ហុយផលិតផលផ្សែងបារី។
ករណីមិនអនុវត្តតាម អ្នកគ្រប់គ្រង ឬម្ចាស់កន្លែងធ្វើការ កន្លែងសាធារណៈ ត្រូវអញ្ជើញអ្នកជក់ឱ្យចេញក្រៅ។ ក្នុងករណីជននោះ មិនអនុវត្តតាម (មិនចេញក្រៅ) អ្នកគ្រប់គ្រង ឬម្ចាស់កន្លែងធ្វើការ កន្លែងសាធារណៈ ត្រូវស្នើសុំទៅសមត្ថកិច្ច ដើម្បីអប់រំណែនាំ ឬអញ្ជើញអ្នកជក់ចេញក្រៅ៕V
Blogger Comment
Facebook Comment