មាតាបិតាជាច្រើន មិនសូវជាចូលចិត្តប៉ុន្មានទេចំពោះថ្ងៃបុណ្យនៃក្តីស្រឡាញ់ដោយ មានការព្រួយបារម្ភពីការជ្រុលជ្រួសរបស់កូនៗពួកគេក្នុងរឿង ស្នេហា ម្យ៉ាងទៀតបុណ្យនេះមិនមានទាក់ទងអ្វីជាមួយនឹងវប្បធម៌ខ្មែរផង។
ទោះបីជាយ៉ាងណាក៏ដោយយុវវ័យមួយចំនួនតែងតែនៅមិនសុខ តែងយកលេសនេះលេសនោះដើម្បីបានទៅដើរលេងជាមួយមិត្តប្រុស មិត្តស្រី របស់ពួកគេក្នុងទិវានៃក្ដីស្រឡាញ់បែបបស្ចិមប្រទេសមួយនេះ។
ប៉ុន្តែសម្រាប់ទិវានៃក្ដីស្រឡាញ់ឆ្នាំនេះប្រហែលជាពិបាកបន្តិច សម្រាប់យុវវ័យមួយចំនួនដែលធ្លាប់ប្រើស្នៀត (លេស) ថា ទៅរៀន ដើម្បីបានចេញទៅដើរលេងជាមួយនឹងមិត្តភក្ដិ ឬក៏សង្សាររបស់គេ ព្រោះឆ្នាំនេះថ្ងៃ ១៤ ខែ កុម្ភៈ ប៉ះចំថ្ងៃបុណ្យជាតិ (មាឃបូជា) ដោយសិស្សនិស្សិតទាំងអស់ត្រូវឈប់សម្រាកពីការសិក្សា និងសាលាត្រូវបិទទ្វារ គ្មានថ្នាក់រៀនទេ។
កញ្ញា លក្ខកេទី វ័យ ១៧ឆ្នាំ បានបង្ហើបប្រាប់ពីគម្រោងរបស់ខ្លួនថា៖ «ថ្ងៃបុណ្យសង្សារខាងមុខនេះ ខ្ញុំនឹងប្រាប់ប៉ាម៉ាក់ថា ខ្ញុំសុំទៅដើរលេង ពីព្រោះរៀនច្រើនពេក ខ្ញុំចង់មានពេលសម្រាកខួរក្បាលខ្លះដើម្បីកាត់ស្ដ្រេស»។ ស្របគ្នានេះដែរ យុវជន វិបូរ អាយុ ១៨ឆ្នាំ បានបន្ដថា៖ «ខ្ញុំចេញទៅដើរលេងធម្មតា ញ៉ាំអី និងទៅក្លិបកម្សាន្ដ»។
ចំណែក ឯយុវតី ជា សុជាតិ ជាសិស្សថ្នាក់ ទី១១ បានប្រាប់ពីលេសរបស់ខ្លួនថា៖ «ខ្ញុំនឹងសុំពួកគាត់ចេញទៅក្រៅ ដោយប្រាប់ថា ទៅញ៉ាំអីបន្ដិចបន្ដួច។ ប៉ុន្ដែបើពួកគាត់មិនព្រម ខ្ញុំនឹងនៅតែចេញដដែលហ្នឹង»។
មិនខុសពីយុវវ័យខាងលើ កញ្ញា តារា រស្មី វ័យ ១៨ឆ្នាំ បានឲ្យដឹងថា ម្ដាយរបស់កញ្ញាតឹងតែងណាស់ ហើយគាត់ក៏មិនចូលចិត្ដថ្ងៃបុណ្យសង្សារនោះទេ។ កញ្ញា រស្មី បានបន្ដថា៖ «យ៉ាងណាមិញ ខ្ញុំមានគម្រោងរួចហើយ។ ខ្ញុំនឹងប្រាប់ប៉ាម៉ាក់ថា ខ្ញុំមានកិច្ចការសាលាត្រូវធ្វើជាក្រុម។ អ៊ីចឹង ខ្ញុំត្រូវចេញទៅប្រជុំការងារជាក្រុមនៅក្រៅផ្ទះ»។
យើងសង្កេតឃើញថា រៀងរាល់ថ្ងៃ ១៤ កុម្ភៈ ម្តងៗ នៅតាមសណ្ឋាគារ ជាពិសេស ផ្ទះសំណាក់ សុទ្ធតែទទួលបានភ្ញៀវចូលពេញៗដែលជាសញ្ញាបញ្ជាក់ពីទង្វើប្រាសចាក សីលធម៌របស់យុវវ័យខ្មែរមួយចំនួន។
មានមតិមួយចំនួនបានយល់ថា ទិវានៃក្ដីស្រឡាញ់បានក្លាយជាថ្ងៃបុណ្យដែលយុវវ័យមួយចំនួនយក ធ្វើជាឱកាសក្នុងការប្រគល់ខ្លួនប្រាណឲ្យគ្នាជាការឆ្លុះបញ្ចាំង ពី ភាពស្រឡាញ់របស់គេទៅវិញ។
កញ្ញា ឡេង លក្ខិណា ជានិស្សិតសាកលវិទ្យាល័យ មេគង្គកម្ពុជា បានបញ្ជាក់ថា៖ «ក្មេងៗខ្លះ អាយុពី ១៥ ទៅ ២៣ ឆ្នាំ ពួកគេនឹងរួមភេទជាពិសេសក្នុងថ្ងៃបុណ្យសង្សារហ្នឹង ដើម្បីបញ្ជាក់ក្តីស្រឡាញ់របស់ពួកគេ។ អ្នកខ្លះអាចជ្រុលជ្រួសរហូតដល់មានផ្ទៃពោះទាំងវ័យក្មេង និងប្រឈមនឹងបញ្ហាសុខភាពទៀតផងក៏មាន»។
លោកវេជ្ជបណ្ឌិត ណុប ធា បម្រើការនៅអង្គការ រ៉ាក់ ខេត្ត កំពត បានឲ្យដឹងថា យុវវ័យមិនគួរឆ្លៀតពេលយកឱកាសនេះដើម្បីធ្វើរឿងផ្តេសផ្តាស ប្រាសចាកពីសីលធម៌ វប្បធម៌ និង ប្រពៃណីនោះទេ។
លោកបានបន្តថា៖ «ក្នុងថ្ងៃបុណ្យសង្សារ បើក្មេងស្រីៗប្រថុយក្នុងការរួមភេទដោយមិនបានគិត ឬតាមការលួងលោមរបស់ដៃគូរបស់គាត់ គាត់អាចប្រឈមនឹងការឆ្លងជំងឺកាមរោគ ដូចជាជំងឺអេដស៍ ជំងឺ ស្វាយ ប្រមេះ និងថ្លើម ព្រមទាំងការមានកូនដោយមិនចង់បានផងដែរ»៕
យុវវ័យសាសងគ្នានៅទិវានៃក្ដីស្រឡាញ់កន្លងមក។ រូបថត ផា លីណា
Blogger Comment
Facebook Comment