SSCA បានចេញលិខិតបញ្ជាមួយចុះថ្ងៃ ទី១២ ខែ ធ្នូ ឆ្នាំ ២០១៣ ដល់ក្រុមហ៊ុន FBC ពោលគឺរយៈពេលជាង ៧ខែ បន្ទាប់ពីក្រុមហ៊ុននេះបានទទួលការយល់ព្រមជាគោលការណ៍ពីការិយាល័យរបស់អភិបាលខេត្ត ព្រះសីហនុ សម្រាប់សេវាកម្មទេសចរណ៍កម្សាន្តដើម្បីមើលទេសភាពរបស់ខ្លួន។
ដោយសារមិនបានទទួលការឆ្លើយតបនឹងរបាយការណ៍ដែលថា ក្រុមហ៊ុន FBC នៅតែធ្វើការហោះហើរ SSCA បានចេញលិខិតបញ្ជាទីពីរកាលពីថ្ងៃ ទី៣ ខែ មករា ឆ្នាំ ២០១៤ និងលិខិតបញ្ជា ទី៣ កាលពីថ្ងៃ ទី២៣ ខែ មករា។
លិខិតចុះកាលបរិច្ឆេទថ្ងៃ ទី៣ ខែ មករា បានឲ្យដឹងថា៖ «រដ្ឋលេខាធិការដ្ឋានអាកាសចរស៊ីវិលសូមផ្អាកការហោះហើររបស់ក្រុមហ៊ុន Flying Boat Cambodia ជាបន្ទាន់រហូតដល់ក្រុមហ៊ុននេះបានបំពេញបែបបទបច្ចេកទេស និងធ្វើការចុះបញ្ជីបច្ចេកទេសអាកាសយាន»។
បច្ចុប្បន្នមានក្រុមហ៊ុនទទួលបានអាជ្ញាប័ណ្ណយន្តហោះកម្សាន្តធុនតូចតែមួយប៉ុណ្ណោះនៅកម្ពុជា។
លោក ឈុន ស៊ីវន អនុប្រធានប្រតិបត្តិការហោះហើរនិងសុវត្ថិភាពផ្លូវអាកាសនៃរដ្ឋលេខាធិការដ្ឋានអាកាសចរស៊ីវិលបានអះអាងពីកិច្ចខិតខំប្រឹងប្រែងរបស់និយតករដើម្បីផ្អាកប្រតិបត្តិការរបស់ក្រុមហ៊ុន FBC ដោយសារតែមានការបារម្ភថា ការហោះហើរកម្សាន្តមើលទេសភាពរបស់ពួកគេកំពុងប៉ះពាល់ដល់ផ្ទៃអាកាសហាមឃាត់របស់ព្រលានយន្តហោះអន្តរជាតិក្រុង ព្រះសីហនុ។
លោក ស៊ីវន បានបន្តថា៖ «ពួកគេចាំបាច់ត្រូវហោះហើរដោយមានការអនុញ្ញាតពី SSCA និងព្រលានយន្តហោះក្រុង ព្រះសីហនុ ដែលមានជើងហោះហើរជាច្រើន។ ពួកគេកំពុងហោះហើរនៅលើផ្លូវនោះ»។
លោកលើកឡើងថា៖ «ជាអកុសល វិធានការបន្ទាប់នឹងត្រូវពាក់ព័ន្ធជាមួយនឹងអាជ្ញាធរក្នុងស្រុក»។
លោក ហ៊ុន ឈឿន ប្រធានព្រលានយន្តហោះក្រុង ព្រះសីហនុ បានថ្លែងថា ក្រុមហ៊ុន FBC កំពុងហោះហើរដោយសេរីកាត់តាមផ្ទៃអាកាសហាមឃាត់ ហើយលោកបានជំរុញឲ្យ SSCA ផ្អាកសកម្មភាពអាជីវកម្មរបស់ពួកគេជាបន្ទាន់។
លោកបានថ្លែងបន្តថា៖ «វាគឺជាហានិភ័យមួយដល់ក្រុមហ៊ុនអាកាសចរណ៍។ បើទោះជាគ្មាននរណាម្នាក់ទទួលរងគ្រោះក៏ដោយ ប៉ុន្តែវាពិតជាមានហានិភ័យប្រសិនបើពួកគេមិនធ្វើតាមការអនុញ្ញាតរបស់ព្រលានយន្តហោះនិង SSCA ហើយអ្វីៗអាចកើតឡើងបាន»។
លោកលើកឡើងថា លោកបានទាក់ទងសមត្ថកិច្ចអនុវត្តច្បាប់ក្នុងមូលដ្ឋានដើម្បីបញ្ឈប់ ដំណើរទេសចរណ៍ហោះហើរដោយសេរី ដោយក្នុងម្នាក់មានតម្លៃ ៥០ ដុល្លារអាមេរិក។
ប៉ុន្តែលោក លឹម វណ្ណាដេត ម្ចាស់ក្រុមហ៊ុន FBC បានច្រានចោលការអះអាងថា អ្នកបើកបរយន្តហោះរបស់លោកបានហោះហើរចូលទៅក្នុងផ្ទៃអាកាសហាមឃាត់ ហើយបាននិយាយថា លោកបានប៉ុនប៉ងទាក់ទងទៅ SSCA តាមទូរស័ព្ទជាច្រើនដង ប៉ុន្តែមិនអាចទទួលបានជំនួយណាមួយទេ។
លោកបន្តថា៖ «ខ្ញុំបានផ្ញើឯកសារស្នើសុំអាជ្ញាប័ណ្ណហោះហើរយន្តហោះកម្សាន្តធុនតូចនេះជាផ្លូវការជាងមួយខែហើយ»។
លោកបានបញ្ជាក់ថា លោកមិនបានបញ្ឈប់ប្រតិបត្តិការហោះហើរភ្លាមៗនៅពេលទទួលបានលិខិតបញ្ជារបស់ SSCA នោះទេ ដោយសារតែក្រុមហ៊ុនរបស់លោកកំពុងហ្វឹកហ្វឺនអ្នកបើកបរយន្តហោះ។
លោកបន្ថែមថា៖ «រដូវភ្ញៀវទេសចរគឺមានរយៈពេលខ្លីណាស់ តែពីរឬបីខែប៉ុណ្ណោះ»។
លោកបានជំរុញឲ្យ SSCA មានភាពបត់បែនជាមួយប្រតិបត្តិករអាជីវកម្មធុនតូចទាក់ទងនឹង ច្បាប់ផ្ដល់អាជ្ញាប័ណ្ណហោះហើរយន្តហោះកម្សាន្តធុនតូច។
យន្តហោះ ៤ គ្រឿងរបស់លោកមានតម្លៃប្រហែល ៣០ ០០០ ដុល្លារក្នុងមួយគ្រឿង គឺជាសកម្មភាពរបស់ភ្ញៀវទេសចរដ៏ពេញនិយមចាប់តាំងពីការបើកដំណើរការកាលពីខែ ឧសភា ឆ្នាំ ២០១៣ មក៕ PB
Blogger Comment
Facebook Comment