ភ្នំពេញៈ មន្ត្រីជាន់ខ្ពស់ពីក្រសួងទេសចរណ៍បានឲ្យដឹងថា ចំណូលពីវិស័យទេសចរណ៍សរុបក្នុងឆ្នាំ២០១៣ បានកើនដល់ ២ ៥៤៧ លានដុល្លារ ប៉ុន្តែអ្នកឃ្លាំមើលអំពីចំណូលក្នុងវិស័យនេះបានលើកឡើងថា ចំណូលចូលរដ្ឋនៅមានចំនួនតិចតួចនៅឡើយ។
លោក ថោង ខុន រដ្ឋមន្ត្រីក្រសួងទេសចរណ៍ ប្រាប់ភ្នំពេញប៉ុស្តិ៍ពីម្សិលមិញថា តួលេខនៃចំណូលសរុបនេះបានកើន១៥ភាគរយធៀបនឹងឆ្នាំ២០១២។
លោកបញ្ជាក់ថា តួលេខនេះជាចំណូលជាតិសរុប មិនមែនជាចំណូលថវិការដ្ឋនោះទេ។ លោកថ្លែងថា៖ «មានន័យថាគេ[ភ្ញៀវទេសចរ] យកមកចាយលើអ្វីក៏ដោយ ឲ្យតែចាយក្នុងស្រុកយើង ចាយលើភោជនីយដ្ឋាន ម្ហូបអាហារ ការស្នាក់នៅ ហូបចុក ដឹកជញ្ជូន ទិញវត្ថុអនុស្សាវរីយ៍ ចាយលើអ្វីទាំងអស់ឲ្យតែគេយកលុយមកទម្លាក់នៅស្រុកយើង ហៅថាចំណូលជាតិ»។
ទោះយ៉ាងណា លោកមិនបានបង្ហាញពីចំណូលថវិការដ្ឋ បានពីវិស័យនេះនោះទេដោយបង្វែរសំណួរនេះទៅកាន់ក្រសួងសេដ្ឋកិច្ច និងហរិញ្ញវត្ថុ ជាអ្នកគ្រប់គ្រងលើការប្រមូលពន្ធ។
មន្ត្រីពីក្រសួងសេដ្ឋកិច្ច និងហរិញ្ញវត្ថុ មិនអាចទាក់ទងសុំការបំភ្លឺពាក់ព័ន្ធនឹងចំនួន និងការប្រើប្រាស់ចំណូលពន្ធដែលទទួលបានពីក្នុងវិស័យទេសចរណ៍នេះទេ កាលពីម្សិលមិញ។
លោក សុន ឆ័យ មន្ត្រីជាន់ខ្ពស់មកពីគណបក្សសង្គ្រោះជាតិ ប្រតិកម្មថា ខណៈចំណូលជាតិសរុបពីវិស័យទេសចរណ៍នេះបន្តកើនឡើង ថវិការដ្ឋដែលប្រមូលពីវិស័យនេះនៅតែតិចជាងការរំពឹងទុក។ លោកថ្លែងថា៖ «យើងឃើញថា ចំណូលនេះបានចូលទៅថវិកាជាតិតិចមែនទែន។
យ៉ាងហោចណាស់ក៏យើងអាចរកបានប្រមាណ ៥០០លាន[ដុល្លារ]ដែរសម្រាប់ថវិកាជាតិ។ ជាទូទៅតាមរបាយការណ៍ក្រសួងសេដ្ឋកិច្ច និងហិរញ្ញវត្ថុ ចំណូលជូនរដ្ឋមិនបាន៤០លានដុល្លារផង។ នេះជាបញ្ហា»។
លោកបន្តថា៖ «វិស័យនេះជាវិស័យសំខាន់ ខ្ញុំជឿថា មិនតិចជាង១០០លានដុល្លារទេនៅក្នុងមួយឆ្នាំៗដើម្បីការចំណាយ។ នៅមានចំណូលក្រៅផ្លូវការច្រើនទៀត»។
លោក អាង គឹមអៀង ប្រធានទីភ្នាក់ងារទេសចរណ៍កម្ពុជា និងជាប្រធានក្រុមហ៊ុនទេសចរណ៍ Great Angkor Tour បានឲ្យដឹងថា ក្រុមហ៊ុនទេសចរណ៍ទាំងអស់សុទ្ធតែតម្រូវឲ្យបង់ពន្ធអាស្រ័យ លើប្រភេទអាជ្ញាប័ណ្ណដែលក្រុមហ៊ុននីមួយៗបានចុះបញ្ជី។
ជាក់ស្តែងក្រុមហ៊ុនរបស់លោកដែលមានតួនាទីជាអ្នកលក់សេវា ទេសចរណ៍ ក៏តម្រូវឲ្យបង់ពន្ធជូនរដ្ឋដែរ។
លោកបានបន្តថា៖ «ពន្ធដែលត្រូវបង់មាន ពន្ធកាត់ទុក១ភាគរយ និងពន្ធអាករលើតម្លៃបន្ថែម ១០ភាគរយ ដែលត្រូវបង់ជារៀងរាល់ខែ និងមានពន្ធលើប្រាក់ចំណេញបន្ថែមទៀតដែលត្រូវបង់ប្រចាំឆ្នាំ»។
លោក សុខ ច័ន្ទមុន្នី តំណាងសមាគមសេវាកម្មដឹកជញ្ជូនកម្ពុជាលើកឡើងថា បច្ចុប្បន្ន១០ភាគរយនៃតម្លៃសំបុត្រធ្វើដំណើរត្រូវបានបង់ជា ពន្ធជូនរដ្ឋ ហើយនៅមានពន្ធជាកាតព្វកិច្ចផ្សេងទៀតដែលក្រុមហ៊ុនបម្រើសេវា ដឹកជញ្ជូនត្រូវបង់។
លោកបន្ថែមថា៖ «ខ្ញុំមិនដឹងថា រដ្ឋយកទៅប្រើប្រាស់យ៉ាងណាទេ? ខ្ញុំជឿថា ថវិកានោះនឹងចូលរដ្ឋ»។
ភ្ញៀវទេសចរមកទស្សនានៅកម្ពុជាសរុបនៅឆ្នាំ២០១៣ មាន៣ ៥៨០ ០០០ នាក់ កើន១៧,៨ ភាគរយធៀបឆ្នាំ២០១២៕
ភ្ញៀវទេសចរជាតិ និងអន្តរជាតិ ដែលទៅទស្សនាប្រាសាទអង្គរវត្តនាពេលកន្លងមក។ រូបថត ហេង ជីវ័ន
Blogger Comment
Facebook Comment