ខេត្តរតនគិរី ៖ លោក សាំង ចន្ថា ជាមេការរបស់ក្រុមហ៊ុន ស៊ីអឌី កំពុងក្លាយជាមេឈ្មួញ ដ៏មានអំណាចក្នុងការដឹកជញ្ជូនឈើអារ ជាច្រើនរយម៉ែត្រគូប ក្នុងមួយខែៗ ចេញពីទីតាំងក្រុមហ៊ុន ស៊ីអឌី ក្នុងស្រុកអណ្តូងមាស ខេត្តរតនគិរីឆ្ពោះទៅលក់ចែកចាយ នៅតាមបណ្តាខេត្តជាច្រើន ក្នុងប្រទេសកម្ពុជា ហើយឈើអារដែលដឹកជញ្ជូន ទៅលក់ដុំ លក់រាយ តាមបណ្តាខេត្តនានា ត្រូវហែកប៉េសេ ដែលជាលិខិតអនុញ្ញាត ដឹកជញ្ជូនឈើស្របច្បាប់ ដែលចេញដោយ រដ្ឋបាលព្រៃឈើ ប៉ុន្តែត្រូវតែយកផល អនុផលព្រៃឈើ ក្នុងក្រុមហ៊ុនសម្បទាន សេដ្ឋកិច្ច ដែលរដ្ឋាភិបាល អនុញ្ញាត ។
ជាទៀងទាត់លោក សាំង ចន្ថា បានត្រូវរ៉ូវជាមួយ មន្ត្រីរដ្ឋបាលព្រៃឈើ បន្លំដឹកឈើលើស ចំនួន ដែលច្បាប់អនុញ្ញាត។ គេដឹងថា លោក សាំង ចន្ថា ប្រមូលបានឈើអារ ជាច្រើនរយម៉ែត្រគូប ក្នុងមួយខែៗ ដឹកយកទៅលក់ដុំ លក់រាយ តាមបណ្តានានា ពីក្រុមឈ្មួញដែលទិញ ត្រង់សឺន័រ រួចជួលកម្មករ ចូលទៅកាប់ និងអារក្នុងតំបន់ ព្រៃសហគមន៍ សុទ្ធសឹងជាឈើខុសច្បាប់ រួចដឹកមកដាក់ នៅក្នុងទីតាំងក្រុមហ៊ុន ដីសម្បទានសេដ្ឋកិច្ច ដើម្បីកែច្នៃពីប្រភេទឈើ អានាធិបតេយ្យ មកជ្រកក្រោមស្លាកក្រុមហ៊ុន ដើម្បីងាយស្រួលសុំប៉េសេ ពីជំនាញរដ្ឋបាលព្រៃឈើ។
សកម្មភាពបំផ្លាញព្រៃឈើរបស់លោក សាំង ចន្ថា និងមេឈ្មួញជាឧកញ៉ា នៅក្នុងដែនជម្រកសត្វព្រៃលំផាត់ មានទ្រង់ទ្រាយធំខ្លាំងណាស់ គឺក្នុងមួយថ្ងៃៗមានការដឹកជញ្ជូន ឈើប្រណីតចេញពីព្រៃការពារ មិនតិចជាង ២រថយន្តច្នៃនោះទេ ហើយបូករួមជាមួយឈើ ដែលប្រមូលទិញដោយខុសច្បាប់ ពីប្រជាពលរដ្ឋឃើញថា សកម្មភាពនៃការបំផ្លាញឈើប្រណីត នៅតំបន់នោះ គួរឲ្យព្រួយបារម្ភបំផុត។ លោក សាំង ចន្ថា បានចាត់ចែងប្រមូលទិញ ឈើប្រណីតដឹកយកទៅលក់ នៅវៀតណាមយ៉ាងអនាធិបតេយ្យ មិនដែលខ្វល់ពីបទបញ្ជារបស់ រាជរដ្ឋាភិបាលនោះទេ ហើយសកម្មភាពនាំចេញ ឈើប្រណីតទៅលក់នៅក្រៅប្រទេស បានជ្រកក្រោមអាជ្ញាប័ណ្ណ ដឹកជញ្ជូនឈើអារ ប្រភេទលេខ២ ជារឿងខុសច្បាប់។
មានការបញ្ជាក់ផងដែរថា លោក សាំង ចន្ថា បានកាប់បំផ្លាញព្រៃឈើ ក្នុងតំបន់ដីសម្បទានរបស់ខ្លួន ហើយធ្វើសកម្មភាព ដឹកជញ្ជូនលើសពីចំនួនកំណត់ ដែលមានចែងក្នុងលិខិតប៉េសេ ដូចជាសម្រាប់ រថយន្តមួយគ្រឿង ជំនាញរដ្ឋបាលព្រៃឈើចេញ លិខិតអនុញ្ញាតឲ្យដឹកជញ្ជូន ឈើប្រមាណ ១៧ម៉ែត្រត្រីគុណប៉ុណ្ណោះ ប៉ុន្តែលោក សាំង ចន្ថា បានលួចដឹកជញ្ជូន និងបង្កប់ឈើប្រណីតដល់ទៅ ៣០ឬ៤០ ម៉ែត្រត្រីគុណ។ ជាគោលការណ៍ ឈើដែលត្រូវបានកាប់បំផ្លាញ នៅក្នុងដីព្រៃសម្បទានយកមកកែច្នៃ សម្រាប់លក់ចែកចាយក្នុងស្រុក ត្រូវបង់ពន្ធជូនរដ្ឋ ប៉ុន្តែលោក សាំង ចន្ថា បានឃុបឃិតជាមួយ ជំនាញរដ្ឋបាលព្រៃឈើ ធ្វើអាជីវកម្មដឹកជញ្ជូនឈើ ដោយមិនបានបង់ពន្ធត្រឹមត្រូវនោះទេ នាំឲ្យខាតបង់ចំណូល ថវិកាជាតិច្រើនសន្ធឹកសន្ធាប់។
សកម្មភាព ដឹកជញ្ជូនឈើខុសច្បាប់ ផ្ទុកលើសពីលិខិតអនុញ្ញាតិ ដែលបានកំណត់ នាំឲ្យមានការបំផ្លាញផ្លូវស្ពានជាច្រើន នៅក្នុងខេត្តរតនគិរី ជាពិសេសនៅ ក្នុងស្រុកអូរយ៉ាដាវ នេះតែម្តង ផ្តើមចេញពីអំពើពុករលួយ របស់មន្ត្រីជំនាញ រដ្ឋបាលព្រៃឈើ ដែលឃុបឃិតជាមួយលោក សាំង ចន្ថា និងឧកញ៉ា ដែលមានលុយច្រើនហូរហៀរ និងជ្រកក្រោមស្លាកសម្បទាន ធ្វើសកម្មភាពបំផ្លាញ ព្រៃឈើយ៉ាងវិនាសហិនហោច ក្នុងតំបន់ជម្រកសត្វព្រៃលំផាត់។ គេចង់ឃើញផ្នែកពាក់ព័ន្ធ ពិនិត្យមើលភាពអនាធិបតេយ្យ ដែលកំពុងបង្កឡើងដោយក្រុមហ៊ុន ស៊ីអឌី ដែលមានលោក សាំង ចន្ថា ជាមេការ និងក្រុមហ៊ុន ហេង ប្រាឌ័រ របស់លោកឧកញ៉ា រ័ត្ន សុខន ឡើងវិញជាបន្ទាន់ ដែលយ៉ាងហោចណាស់ ត្រូវរៀបចំឲ្យមានការគោរពច្បាប់ទម្លាប់ ដូចមានចែងក្នុងកិច្ចព្រមព្រៀង។
សូមបញ្ជាក់ថា ក្រុមហ៊ុន ស៊ីអឌី និងក្រុមហ៊ុន ហេង ប្រាឌ័រ របស់លោកឧកញ៉ា រ័ត្ន សុខន មិនទាន់បានបំពេញកាតព្វកិច្ច ដូចមានចែងក្នុងកិច្ចព្រមព្រៀងនោះទេ ឃើញតែកាប់បំផ្លាញព្រៃឈើ ធ្វើអាជីវកម្មនិងប្រមូលទិញឈើខុសច្បាប់ យកទៅលក់នៅវៀតណាម សុទ្ធសឹងជាប្រភេទឈើប្រណីត មានតម្លៃខ្ពស់ ហើយការកាប់បំផ្លាញព្រៃឈើ លក់ចែកចាយក្នុងស្រុក ក៏មិនបានបង់ពន្ធ ជូនរដ្ឋឲ្យបានត្រឹមត្រូវ តាមគោលការណ៍នោះទេ។ សម្តេច ហ៊ុន សែន ធ្លាប់បានព្រមានជារឿយៗថា ត្រូវដកហូតអាជ្ញាប័ណ្ណ ពីក្រុមហ៊ុនសម្បទាន ដែលបំពានច្បាប់ ឬកាប់បំផ្លាញព្រៃឈើ យ៉ាងអនាធិបតេយ្យ ដូច្នេះករណីក្រុមហ៊ុន ស៊ីអឌី របស់លោក សាំង ចន្ថា និងក្រុមហ៊ុន ហេងប្រាឌ័រ របស់លោកឧកញ៉ា រ័ត្ន សុខន គួរតែជាកម្មវត្ថុដ៏សំខាន់មួយ ដែលរាជរដ្ឋាភិបាល ត្រូវពិចារណាឡើងវិញ ៕
Blogger Comment
Facebook Comment