ភ្នំពេញ ៖ គ្លីនិកវេជ្ជបុត្ររងនូវការចោទប្រកាន់ពីស្ត្រីម្នាក់ថា បានវះកាត់យកកូនចេញគ្មានបច្ចេកទេស និងអនាម័យ ត្រឹមត្រូវបង្កឲ្យឆ្លងមេរោគអេដស៍នៅពេលបញ្ចូលឈាម ហើយមិនទទួលខុសត្រូវ និងថែមទាំងបានប្តឹងស្ត្រីរងគ្រោះពីបទជំរិតទាប្រាក់ទៅវិញ។
ស្ត្រីម្នាក់អះអាងថា ជាជនរងគ្រោះមានឈ្មោះ ស្មាន ម៉ារីយ៉ាន អាយុ៥១ឆ្នាំ ស្នាក់នៅផ្ទះលេខ៤៣ ផ្លូវជាតិលេខ៥ ក្រុម៣ភូមិ កៅឡាត ឃុំបាឡី ស្រុកបរិបូរណ៍ ខេត្តកំពង់ឆ្នាំង ។ ចំណែកម្ចាស់គ្លីនិកដែលរងនូវការចោទប្រកាន់ឈ្មោះ សេង ហាក់ស្រ៊ុន និងប្រពន្ធឈ្មោះឡាច គីមហ៊ាង ។
ស្ត្រីឈ្មោះ ស្មាន ម៉ារីយ៉ាន បានរៀបរាប់ឲ្យដឹងថា កាលពីខែ៧ ឆ្នាំ១៩៩៨ គាត់បានទៅពិគ្រោះយោបល់ជាមួយលោកវេជ្ជ បណ្ឌិត សេង ហាក់ស្រ៊ុន ដែលជាម្ចាស់គ្លីនិកវេជ្ជបុត្រដែលមាន មានទីតាំងស្ថិតនៅផ្ទះលេខ ១៧៣ ផ្លូវ១៦៣ សង្កាត់ទូលទំពូង២ ខណ្ឌចំការមន ដោយសារគាត់មានផ្ទៃពោះចំនួន៥ខែ តែកូនបានស្លាប់នៅក្នុងពោះ ដើម្បីរកវិធីយកកូនចេញដោយលោកគ្រូពេទ្យ សេង ហាក់ស្រ៊ុន និងប្រពន្ធ ឡាច គីមហ៊ាងយកថ្លៃ ចំនួន១៥០ដុល្លារ ក្រោយពីពិភាក្សាជាមួយប្តីគាត់ក៏ព្រមឲ្យលោកគ្រួពេទ្យយកកូនដែលស្លាប់ក្នុងពោះចេញ ប៉ុន្តែក្រោយពីយកកូនចេញរួច លោកគ្រូពេទ្យប្រាប់ថាធ្លាក់ឈាមហូរមិនឈប់ច្រើនណាស់ ទាល់តែបញ្ចូលឈាម និងវះកាត់យកស្បូនចេញទើបអាច ទើបអាចសង្គ្រោះបាន គាត់ក៏យល់ព្រមឲ្យលោកគ្រូពេទ្យ សេង ហាក់ស្រ៊ុន ធ្វើការវះគាត់ ដោយគ្រួពេទ្យទាថ្លៃវះកាត់ចំនួន៩៩៩ដុល្លារ។
ស្ត្រីឈ្មោះ ស្មាន ម៉ារីយ៉ាន បន្តថា ក្រោយពីដឹងខ្លួនអ្នកបុគ្គលិកនៅទីនោះបានមកអង្គុយ និងនិយាយលេងប្រាប់ថា គាត់ធ្លាក់ឈាមហូរមិនឈប់ សំណាងហើយលោកគ្រូពេទ្យបានទិញឈាមពីអ្នករត់ម៉ូតូឌុបនៅក្បែរនោះបញ្ចូលឲ្យគាត់បានទាន់ពេល បើពុំនោះទេបងស្រីអាចនឹងមានគ្រោះថ្នាក់។ បន្ទាប់ពីឮដូច្នេះគាត់ក៏មិនចាប់អារម្មណ៍អ្វីពីការឆ្លងជម្ងឺឡើយដល់ពេលកំណត់គាត់ក៏បានត្រឡប់ទៅផ្ទះវិញ ប៉ុន្តែអាការៈគាត់ខុសពីធម្មតា ស្គមអស់កំលាំង ដោយឃើញអាការៈគាត់ចេះតែមិនស្រួលទៅៗ គាត់និងប្តីក៏សម្រេចចិត្តទៅពិនិត្យឈាមនៅវិទ្យាស្ថានប៉ាស្ទ័រ គ្រូពេទ្យបញ្ជាក់ថាគាត់ផ្ទុកជម្ងឺអេដស៍។
គ្រាន់តែឮដូច្នោះភ្លាមគាត់គ្មានកំលាំងកំហែង ហើយបានទៅស្រែកយំនៅក្នុងគ្លីនិកវេជ្ជបុត្រ ដោយសុំឲ្យលោកគ្រួពេទ្យទទួលខុសត្រូវចំពោះរូបគាត់ព្រោះគាត់ និងស្វាមីនិងកូនបីនាក់ទៀតមិនមានជម្ងឺអេដស៍ឡើយ ហើយការឆ្លងជម្ងឺនេះមកគាត់គឺដោយសារលោកគ្រួពេទ្យបញ្ចូលឈាមមិនល្អឲ្យគាត់នៅពេលវះកាត់។ មិនត្រឹមតែគាត់ឆ្លងជម្ងឺទេសូម្បីតែកូនប្រុសបុគ្គលិកនៅទីនោះដែលយកឈាមកន្លះផ្លោកនៅសល់ពីគាត់ទៅបញ្ចូលក៏ឆ្លងជម្ងឺដូចគាត់ដែរ។
ដោយពិនិត្យឃើញការពិតមិនអាចប្រកែកបាន លោកគ្រូពេទ្យ សេង ហាក់ស្រ៊ុន និងប្រពន្ធ ឡាច គីមហ៊ាង ភាគីគ្លីនិកបានធ្វើកិច្ចការសម្របសម្រួលជាមួយគាត់ដោយធ្វើកិច្ចសន្យាមួយដោយទទួលស្គាល់ និងជួយចេញថ្លៃទិញថ្នាំព្យាបាលជម្ងឺក្នុង១ខែ ថ្លៃ៣៧៤ដុល្លារ រហូតដល់CD4 ឡើងគ្រប់៧០០វិញដោយមិនឲ្យគាត់ដើរបរិហារកេរ្តិ៍ពីរឿងចម្លងមេរោគឡើយ។ ជារៀងរាល់ខែគាត់ទៅបើកថ្នាំនៅគ្លីនិក ឡាប៉េ ម្តុំអូឡាំពិករហូតមក។
លុះដល់ ថ្ងៃទី២០ខែ ឧសភា ឆ្នាំ២០១៣ គាត់បាន ទូរស័ព្ទទៅម្ចាស់គ្លីនិក វេជ្ជបុត្រ សុំបើកលុយមុន១ខែ សរុបពីខែ សុំយកតែ៧០០ដុល្លាប៉ុណ្ណោះ ព្រោះគាត់ជាប់រវល់ទៅប្រទេសវៀតណាមដើម្បីទិញថ្នាំទុក។ ប៉ុន្តែភាគីគ្លីនិកមិនព្រមឲ្យគាត់ឡើយ ហើយក៏បញ្ឈប់លែងអោយគាត់តែម្តងទោះបីគាត់ទារ មួយខែ៣៧៤ដុល្លារ ធម្មតាឡើងវិញក៏គេលែងឲ្យទាំងអស់។
គាត់បានព្យាយាមទំនាក់ទំនងជាមួយភាគីគ្លីនិករហូតតែគេមិនព្រមនិយាយជាមួយដោយខឹងខ្លួនមានជម្ងឺហើយត្រូវគេក្បត់កិច្ចសន្យាគាត់បានទៅស្រែកយំនៅក្នុងគ្លីនិក វេជ្ជបុត្រដោយសុំឲ្យភាគីគ្លិនិច បន្តជួយចេញថ្នាំឲ្យគាត់បន្តទៀត តែគេមិនព្រមថែមទាំងប្តឹងសមត្ថកិច្ចឲ្យចាប់ខ្លួនឃាត់ដោយចោទប្រកាន់ថាគាត់ទៅជំរិតទារប្រាក់ពីលោកគ្រូពេទ្យ សេង ហាក់ស្រ៊ុននិងប្រពន្ធ ឡាច គីមហ៊ាងចំនួន៧០០ដុល្លារ ទៅវិញ។
ស្ត្រីរូបនោះបន្តទៀតថា ដើម្បីរកយុត្តិធម៌ដែលគាត់រងគ្រោះដោយលោកគ្រូពេទ្យ សេង ហាក់ស្រ៊ុន និងប្រពន្ធ ឡាច គីមហ៊ាង ម្ចាស់គ្លីនិក វេជ្ជបុត្រ ដែលប្តឹងគាត់ពីបទគំរាមទារប្រាក់៧០០ដុល្លារគាត់ក៏បានសម្រេចដាក់ពាក្យបណ្តឹងទៅសាលាដំបូង រាជធានីភ្នំពេញ ប៉ុន្តែសុំណុំរឿងត្រូវបានតុលាការផ្អឹបទុកចោលមិនចាត់ការ មិនតែប៉ុណ្ណោះលោកគ្រូពេទ្យ សេង ហាក់ស្រ៊ុននិងប្រពន្ធ ឡាច គីមហ៊ាង ម្ចាស់គ្លីនិក វេជ្ជបុត្រ ថែមទាំងយកឈ្មោះកូនប្រុសថ្នាក់ដឹកនាំមកគំរាមស្ត្រីរងគ្រោះទៀតផង។ រឿងនេះគាត់មិនសុខចិត្តទេ គាត់នឹងទាមទាររកយុត្តិធម៌រហូតដល់ទីបញ្ចប់ ដរាបណាគាត់នៅមានជីវិត។
ពាក់ព័ន្ធនឹងបញ្ហានេះសារព័ត៌មានមិនអាចសុំការបំភ្លឺពីឈ្មោះ សេង ហាក់ស្រ៊ុន និងប្រពន្ធឈ្មោះឡាច គីមហ៊ាង ម្ចាស់គ្លីនិក វេជ្ជបុត្រ បានឡើយ ដោយទូរស័ព្ទមិនចូល ហើយ ក្រុមអ្នកកាសែតព្យាយាមទៅដល់គ្លីនិកដើម្បីសាកសួរ ប៉ុន្តែលោកមិននៅផ្ទះ ហើយក្រោយមកឈ្មោះ សេង ហាក់ស្រ៊ុន និងប្រពន្ធឈ្មោះឡាច គីមហ៊ាង ម្ចាស់គ្លីនិក វេជ្ជបុត្រ បែជាចោទប្រកាន់ថាស្ត្រីរងគ្រោះនិងក្រុមអ្នកសារព័ត៌មានទៅអុកឡុកគ្លីនិចគាត់ទៅវិញ៕
Blogger Comment
Facebook Comment