ភ្នំពេញ ៖ បុរសសក់ត្រងោលម្នាក់ដែលគេស្គាល់យ៉ាងច្បាស់ថាជាអតីតព្រះសង្ឃដែលគង់នៅវត្ដបទុមវតីទើបនឹងសឹក ថ្មីមិនដឹងជាមានបញ្ហាផ្លូវចិត្តអ្វីបានឡើងលើស្ពាន់ជ្រោយចង្វាទាំងទឹកមុខក្រៀមក្រំមានកាន់ដបស្រាមួយដបផងនោះពេលមកដល់ពាក់កណ្តាលស្ពាន់ក៏ហក់លោតប្រូងបណ្តាលឲ្យលិចបាត់រកសពមិនទាន់ឃើញនូវឡើយមកទល់រសៀលថ្ងៃទី០៥ ខែឧសភា ឆ្នាំ២០១៤នេះ។
ដែលហេតុការណ៍ព្រះសង្ឃទើបសឹកមកលោតទឹកសម្លាប់ខ្លួនពីលើស្ពានជ្រោយចង្វាបង្កឲ្យមានការភ្ញាក់ផ្អើលនោះបានកើតឡើងកាលពីវេលាម៉ោង៩និង៣០នាទីព្រឹកថ្ងៃទី០៣ ខែឧសភា ឆ្នាំ២០១៤។
សមត្ថកិច្ចប្រចាំការគោលដៅស្ពាន់ជ្រោយចង្វាបានឲ្យដឹងថា បុរសដែលដើរមកលោតទឹកសម្លាប់ខ្លួននេះបានបន្សល់ទុកនូវលិខិតបញ្ជាក់ការសិក្សាពីចៅអធិការវត្ដភ្នៀតសិម្ពលី ស្ថិតនៅសង្កាត់ស្នោ ខណ្ឌពោធិ៍សែនជ័យរួមទាំងបន្សល់ទុកឆាយាផងដែរ។
តែទោះជាយ៉ាងណាបុរសដែលគិតខ្លីរូបនោះត្រូវបានគេស្គាល់ថាឈ្មោះ អ៊ឹង ឆាយ អាយុ៥១ឆ្នាំ ស្នាក់នៅរៀនធម៌ក្នុងវត្ដបទុមវតី បួសនៅវត្ដភ្នៀតសិម្ពលី និងមានស្រុកកំណើតនៅភូមិអង្កាញ់ ឃុំអង្កាញ់ ស្រុកព្រៃកប្បាស ខេត្ដតាកែវ។
ប្រភពព័ត៌មានពីមន្ដ្រីនគរបាលការពារស្ពានជ្រោយចង្វាបានឲ្យដឹងទៀតថា នៅមុនពេលកើតហេតុ នៅវេលាម៉ោងជាង៩ព្រឹកថ្ងៃទី០៣ ខែឧសភាបុរសរូបនេះបានធ្វើដំណើរដោយថ្មើរជើងដោយមានកាន់ដបស្រានៅនឹងដៃដើរផឹកបណ្តើរដើរឡើងលើស្ពានជ្រោយចង្វាពីលិចមកកើតលុះមកដល់ពាក់កណ្តាលស្ពានបម្រុងលោតទឹកសម្លាប់ខ្លួនម្ដងមកហើយតែភា្លមៗនោះត្រូវបាននគរបាលប្រចាំការលើស្ពានឃើញទាន់ក៏មកឃាត់សួរនាំបុរសអតីតសង្ឃរូបនោះបានប្រាប់ថាប្រពន្ធឲ្យប្រាក់គាត់ជិះម៉ូតូឌុបមកលោតទឹកសម្លាប់ខ្លួនទៅហើយ ពេលនោះក៏ត្រូវបាននគរបាលអប់រំឲ្យគាត់វិលត្រឡប់ទៅផ្ទះវិញ ហើយបុរសរូបនោះក៏សុខចិត្តដើរចុះមកក្រោមវិញផងដែរតែប្រហែលជាកន្លះម៉ោងក្រោយមកក៏ស្រាប់តែឃើញបុរសរូបនោះដដែលបានដើរឡើងទៅលើស្ពានម្តងទៀតសមត្ថកិច្ចរត់ទៅចាប់ឃាត់មិនទាន់ ពោលគឺគ្រាន់តែក្រឡេកឃើញសមត្ថកិច្ចរត់មកចាប់ឃាត់ទៀតនោះគាត់ក៏ប្រញាប់លោតរំលងលើបង្កាន់ដៃស្ពានចូលទឹកសម្លាប់ខ្លួនលិចបាត់តែម្តង ហើយភ្លាមៗនោះសមត្ថកិច្ចក៏បានចេញទូកក្នុងគោលបំណងជួយសង្គ្រោះដែរតែរកមិនឃើញឡើយ។
សមត្ថកិច្ចបានដាក់ការសង្ស័យថា បុរសម្នាក់ដែលទើបពីសឹកហើយមកលោតទឹកសម្លាប់ខ្លួននេះប្រហែលគាត់មានវិបត្ដិអ្វីមួយមិនអាចដោះស្រាយចេញឡើយទើបសម្រេចធ្វើដំណើរមកលោតទឹកសម្លាប់ខ្លួនពីលើស្ពានជ្រោយចង្វាបើទោះបីសមត្ថកិច្ចចាប់ឃាត់ទាន់ពេលម្តងរួចហើយនូវតែព្យាយាមមកលោតលើកទី២សម្រេចតាមបំណងរបស់គាត់តែម្តងទៅ។
សមត្ថកិច្ចបញ្ជាក់ថា បន្ទាប់ពីបុរសរូបនោះលោតទឹកបានមួយថ្ងៃរួចមកនៅព្រឹកថ្ងៃទី០៤ ខែឧសភា មានក្មួយប្រុសរបស់បុរសរូបនោះបានធ្វើការសួរនាំពីសមត្ថកិច្ចដែរ ហើយពេលសមត្ថកិច្ចសួរនាំក្មួយរូបនោះនិយាយថាគាត់មិនដឹងថាឪពុកមារបស់ខ្លួនមានរឿងអ្វីនោះទេបានជាបួសសុខៗហើយក៏សឹក ហើយមកលោតទឹកសម្លាប់ខ្លួនបែបនេះឡើយ៕
Blogger Comment
Facebook Comment