វាជាសកម្មភាពមួយមិនគួរឲ្យជឿនៅក្នុងប្រទេសជប៉ុន ខណៈឪពុកម្តាយមួយចំនួនបាននាំគ្នាយកទារកតូចរបស់ខ្លួនទៅប្រកួតយំ ពេលដែលឪពុកម្តាយជាទូទៅចង់ឲ្យតែកូនបាត់យំ។ ក្នុងព្រឹត្តិការណ៍នោះ ឪពុកម្ដាយភាគច្រើនបាននាំគ្នាឆ្ការដៃឆ្ការជើងពេលទារករបស់ពួកគេស្រែកយំ ហើយគិតតែរកវិធីយ៉ាងម៉េចដើម្បីឲ្យទារកយំបានយូរ។ ប៉ុន្តែព្រឹត្តិការណ៍នេះកើតមានចំពោះអ្នកកីឡាបោកចំបាប់ស៊ូមូ (sumo) ដែលបន្លាចទារកឲ្យយំ រួចចាំសើចវិញ។
ថ្មីៗកន្លងទៅនេះ ជប៉ុនបានរៀបចំកម្មវិធីប្រកួតទារកយំប្រចាំឆ្នាំនៅទីក្រុងតូក្យូ។ អ្នកទារកណាយំមុនគេ គឺឈ្នះ។ លក្ខខណ្ឌប្រកួតគឺ កីឡាករស៊ូមូបីទារក និងព្យាយាមធ្វើឲ្យទារកយំ ដោយធ្វើជាសំឡេង និងមុខចម្លែកៗ ឬអាចដល់ពាក់មុខបន្លាចទៀតផង។ ទារកណាដែលយំមុនគេ គឺឈ្នះ។ បើទារកទាំងពីរយំក្នុងពេលដំណាលគ្នា ទារកណាដែលពូកែស្រែកយំឮជាងគេគឺឈ្នះ។
វាហាក់ដូចជាការកម្សាន្តខុសទំនង និងអាក្រក់មើល ដោយបន្លាចក្មេងដល់យំ ហើយចាស់ៗសើច ប៉ុន្តែ ការប្រកួតនេះគឺផ្អែកលើអប្បិយជំនឿក្នុងវប្បធម៌ជប៉ុន។ ជប៉ុនជឿថា សំឡេងស្រែកយំរបស់ទារក នឹងបន្លាចបណ្ដេញព្រាយបិសាចឲ្យចាកចេញឆ្ងាយ ដែលនេះមានន័យថា ទារកនឹងរីកធំធាត់មានសុខភាពល្អ។ អីចឹងហើយ ទើបឪពុកម្ដាយទារក យកកូនៗពួកគេទៅចូលរួមប្រកួត៕
Blogger Comment
Facebook Comment