ភ្នំពេញ: គេហទំព័ររបស់ក្រសួងទេសចរណ៍ បង្ហាញថា វិមានឯករាជ្យ ត្រូវបានកសាងឡើងនៅឆ្នាំ១៩៥៨ សម្រាប់ជាស្តូបគោរពវិញ្ញាណក្ខ័ន្ធយុទ្ធជនអ្នកសេ្នហាជាតិ ក្រោយពេលសង្គ្រាមបានបញ្ចប់នៅកម្ពុជា និងដើម្បីប្រារព្ធនូវសេរីភាព និងឯករាជ្យ ដែលកម្ពុជា បានរួចចេញពីការគ្រប់គ្រងរបស់ប្រទេសបារាំង។
វិមានឯករាជ្យ ឈរយ៉ាងខ្ពស់ត្រដែត នៅផ្លូវខ្វែង នៃមហាវិថីព្រះនរោត្តម និងរុក្ខវិថីព្រះសីហនុ នៅចំកណ្តាលបេះដូង នៃរាជធានីភ្នំពេញ។
វិមានឯករាជ្យ ត្រូវបានគូរប្លង់ឡើងដោយស្ថាបត្យករខ្មែរសម័យទំនើបដ៏ចំណាន គឺលោក វណ្ណ ម៉ូលីវណ្ណ ដែលមានរាង ដូចជា ចេតីយរូបផ្កាឈូក ស្រដៀងទៅនឹងប្រាសាទអង្គរវត្តរបស់ខ្មែរដ៏អស្ចារ្យ និងតំបន់ប្រវត្តិសាស្ត្រខ្មែរដទៃទៀត។
វិមានឯករាជ្យ មានប្រាំថ្នាក់ ដែលរំលេចទៅដោយនាគ ១០០ ហើយគួរឲ្យចាប់អារម្មណ៍បំផុត នៅថ្ងៃរសៀល ជាពេលដែលព្រះអាទិត្យអស្តង្គត ចោលនូវស្រមោលមកលើរូបចម្លាក់ ដោយបង្ហាញឲ្យឃើញនូវការចាក់ស្រេះនៃរចនាបថ និងធ្វើឲ្យវិមានឯករាជ្យទាំងមូលភ្លឺចិញ្ចែងចិញ្ចាំង។
ប្រទេសកម្ពុជា បានប្រារព្ធបុណ្យឯករាជ្យជាតិ នៅថ្ងៃទី៩ ខែវិច្ឆិកា ជារៀងរាល់ឆ្នាំ។ វិមានឯករាជ្យ ជាទីដ៏សំខាន់បំផុតមួយ នៅរាជធានីភ្នំពេញ បានក្លាយជាកន្លែងប្រារព្ធពិធី នៅពេលដែលព្រះមហាក្សត្រ ទ្រង់ដឹកនាំប្រារព្ធពិធីដ៏មហោឡារឹកប្រចាំឆ្នាំ ដោយប្រទានភ្លើងជ័យ នៅក្នុងវិមានឯករាជ្យ ពីមុខក្រុមមន្ត្រី អ្នកមុខអ្នកការក្នុងជួររដ្ឋាភិបាល ផ្នែកឯកជន និងសាធារណជនជាច្រើននាក់ទៀត។
ពិធីបុណ្យឯករាជ្យជាតិដ៏ធំជារៀងរាល់ឆ្នាំ ត្រូវបានប្រារព្ធឡើង ដើម្បីរំលឹកដល់ស្នាព្រះហស្ថ របស់សម្តេចព្រះ នរោត្តម សីហនុ ដែលព្រះអង្គបានដឹកនាំធ្វើព្រះរាជបូជនីយកិច្ច ដណ្តើមឯករាជ្យភាពពេញលេញពីប្រទេសបារាំង នៅថ្ងៃទី៩ ខែវិច្ឆិកា ឆ្នាំ១៩៥៣។ បារាំង បានធ្វើជាអាណាព្យាបាលកម្ពុជា ចាប់តាំងពីឆ្នាំ១៨៦៣ ដល់ថ្ងៃទី៩ ខែវិច្ឆិកា ឆ្នាំ១៩៥៣៕
Blogger Comment
Facebook Comment