កំពង់ឆ្នាំង ៖ រថយន្តមួយគ្រឿងបានក្រឡាប់ធ្លាក់ផ្លូវបះជើងឡើងលើមិនខ្ចីខ្មាសគេព្រោះតែផ្ទុះកង់ក្រោយទាំង២ដោយសារតែដឹកអង្ករលើសទម្ងន់។ ហេតុការណ៍នេះបានកើតឡើងនៅម៉ោង១០នាទីយប់ថ្ងៃទី១៨ ខែមេសា ឆ្នាំ២០១៤ លើផ្លូវជាតិលេខ៥ ក្នុងភូមិស្នោ ឃុំពពេល ស្រុកបរិបូរណ៍ ខេត្តកំពង់ឆ្នាំង។
សមត្ថកិច្ចមូលដ្ឋានបានអោយដឹងថា រថយន្តរងគ្រោះខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3A-1392 អ្នកបើកបរមិនបានប្រាប់អោយដឹងពីអត្តសញ្ញាណឡើយ គេដឹកអង្ករហៀរទ្រុងពីបាត់ដំបងទៅភ្នំពេញ លុះមកដល់ចំណុចកើតហេតុក៏បានផ្ទុះកង់ក្រោយទាំង២រេចង្កូតធ្លាក់ពីលើផ្លូវជាតិក្រឡាប់បះជើងឡើងលើចាក់អង្ករចោលពេញដី។
ក្នុងហេតុការណ៍នេះបណ្តាលអោយអ្នកបើកបរ និងព្រូរថយន្តរងរបួសស្រាល។ សមត្ថកិច្ចបានអោយដឹងទៀតថា មូលហេតុដែលបណ្តាលអោយរថយន្តខាងលើនេះក្រឡាប់ដោយសារតែគេផ្ទុកអង្ករលើសចំណុះ និងកង់រថយន្តអន់ផងនោះធ្វើអោយកង់រថយន្តមិនអាចទ្រាំទ្រនឹងទម្ងន់ដ៏ធ្ងន់បានក៏ផ្ទុះកង់ក្រោយទាំង២តែម្តង។
ក្រោយពេលកើតហេតុម្ចាស់រថយន្តបានជួលរថយន្តមកស្ទូច និងដឹកយកអង្ករទៅកាន់គោលដៅរបស់គេបន្តទៀត។ ករណីនេះជាមេរៀនមួយសំរាប់អ្នកបើកបរដឹកទំនិញទាំងឡាយគួរតែផ្ទុកទំនិញអោយបានត្រឹមត្រូវតាមចំណុះរបស់រថយន្ត និងក៏ត្រូវត្រួតពិនិត្យកង់រថយន្តទាំងអស់របស់រថយន្តផងដែរដើម្បីកុំអោយមានគ្រោះថ្នាក់ស្តាយក្រោយដូចករណីខាងលើ ម្យ៉ាងទៀតក៏អាចបង្កអោយមានគ្រោះថ្នាក់ដល់អាយុជីវិតខ្លួនឯង និងអ្នកដទៃផងដែរបើអ្នកបើកបរនិងម្ចាស់រថយន្តមិនបានយកចិត្តទុកដាក់៕
Blogger Comment
Facebook Comment