ភ្នំពេញៈ ជនសង្ស័យ ដែលត្រូវបានចោទប្រកាន់រួចហើយពីបទចាក់សម្លាប់បុគ្គលិកជនជាតិ ហូឡង់ ធ្វើការឲ្យអង្គការសហប្រជាជាតិ នឹងប្រឈមបទចោទប្រកាន់មនុស្សឃាតមួយថែមទៀត បន្ទាប់ពីនគរបាលទទួលសេចក្តីជូនដំណឹងផ្លូវការថា ជនរងគ្រោះ ទី២ គឺក្មេងស្រីអាយុ ១៩ខែ របស់សពស្រ្តីរងគ្រោះបានស្លាប់កាលពីថ្ងៃពុធនោះ។
ស្ថានទូត ហូឡង់ នៅ ទីក្រុងបាងកក ប្រទេសថៃ និងមន្ទីរពេទ្យ Bangkok General បានបញ្ជាក់កាលពីម្សិលមិញថា ក្មេងស្រី Dana Beerdsen កូនរបស់អ្នកស្រី Daphna Beersden បុគ្គលិកអង្គការ UN-Habitat អាយុ ៣១ឆ្នាំ បានស្លាប់នៅឯមន្ទីរពេទ្យ កាលពីយប់ថ្ងៃពុធ។ ក្មេងស្រី Dana ត្រូវបានវះកាត់ជាច្រើនលើក ក្នុងស្ថានភាពធ្ងន់ធ្ងរ បន្ទាប់ពីរងរបួសក្បាល ក្នុងអំឡុងពេលវាយប្រហារ។
លោក មុំ ស៊ីថា ប្រធានការិយាល័យនគរបាលអន្តោប្រវេសន៍រាជធានីភ្នំពេញ បានថ្លែងពីការចោទប្រកាន់ប្រឆាំងនឹងបុរសឈ្មោះ ជា ពិន អាយុ ៣៥ឆ្នាំ ថា៖ «ពេលយើងទទួលបានរបាយការណ៍ជាផ្លូវការពីការស្លាប់ក្មេងស្រី Dana យើងនឹងបន្ថែមបទចោទមនុស្សឃាតប្រឆាំងនឹងជនសង្ស័យ។ កាលបរិច្ឆេទចោទប្រកាន់លើក ទី២ របស់តុលាការពុំទាន់បានកំណត់នៅឡើយទេ»។
ជនសង្ស័យ ជា ពិន ត្រូវសាលាដំបូងរាជធានីភ្នំពេញ ចោទប្រកាន់កាលពីថ្ងៃសៅរ៍ពីបទមនុស្សឃាតដោយចេតនាមានស្ថានទម្ងន់ទោស ចំពោះការសម្លាប់អ្នកស្រី Beersden ហើយកំពុងឃុំខ្លួនបណ្តោះអាសន្ននៅពន្ធនាគារ ព្រៃស។
មន្ត្រីនគរបាលបានប្រាប់ថា លោកស្រី Beersden ត្រូវគេឃើញស្លាប់ដោយសារត្រូវគេចាក់ ហើយក្មេងស្រី Dana ត្រដររស់ជាមួយអាការរបួសក្បាលធ្ងន់ធ្ងរនៅក្នុងផ្ទះជួល នៅ ខណ្ឌចំការមន កាលពីថ្ងៃ ទី២៨ ខែមេសា។ អ្នកស៊ើបអង្កេតសន្និដ្ឋានថា អ្នកស្រី Beersden ត្រូវចាក់សម្លាប់ ដោយដែក ទួរណឺវិស ហើយកូនគាត់រងរបួសក្បាលដោយសាររងនឹងវត្ថុរឹង។
នគរបាលបន្ថែមថា ជា ពិន ចូលទៅក្នុងផ្ទះគាត់ហើយព្យាយាមលួចកង់តែត្រូវគាត់ស្រែករកជំនួយ ពេលនោះជា ពិន បានចាក់គាត់ ៦ ទួរណឺវិស និងវាយក្បាលកូនស្រីគាត់។
ក្មេងស្រី Dana បានជញ្ជូនតាមយន្តហោះទៅមន្ទីរពេទ្យ Bangkok General ហើយបានទទួលការវះកាត់ជាច្រើនលើករហូត ៩ ថ្ងៃក្រោយមកទើបនាងបានស្លាប់។
តាមសេចក្តីថ្លែងការណ៍របស់អង្គការសហប្រជាជាតិឲ្យដឹងថា លោក Joris Oele ទីប្រឹក្សាអន្តរជាតិនៅអង្គការ UN-Habitat ជាឪពុកក្មេងស្រីនិងដៃគូរបស់អ្នកស្រី Beerdsen បានអមដំណើរកូនតាមយន្តហោះនិងរង់ចាំនៅមន្ទីរពេទ្យ។
យោងតាមអ៊ីមែលដែលផ្ញើមកឲ្យសមាជិក Chabad Jewish Center នៅ ខណ្ឌដូនពេញ ថា ក្មេងស្រី Dana បានស្លាប់នៅម៉ោង ៩:៤៥ នាទី។ លោក Rabbi Bentzion Butman ប្រធានមជ្ឈមណ្ឌលឲ្យដឹងថា អ្នកស្រី Beerdsen ជាសមាជិកសកម្មនៅទីនោះ ១ ឆ្នាំមកហើយ។
តាមអ៊ីមែល ដែលផ្ញើជូនសមាជិកជិត ១០០ នាក់ ក្នុងសហគមន៍នេះឲ្យដឹងថា៖ «យើងមានសេចក្តីទុក្ខសោកយ៉ាងខ្លាំងសូមជម្រាបថា កូន Dana ពុំរស់រានមានជីវិតពីការវាយប្រហារដ៏ព្រៃផ្សៃនេះទេ»។
មូលហេតុពិតប្រាកដនៃការស្លាប់របស់ក្មេងស្រី Dana នៅពុំទាន់ច្បាស់លាស់ភ្លាមៗទេ ខណៈបុគ្គលិកនៅមន្ទីរពេទ្យ Bangkok General ប្រាប់ថា គាត់អាចបញ្ជាក់បានត្រឹមតែការស្លាប់របស់ក្មេងនេះទេ ខណៈបុគ្គលិកមន្ទីរពេទ្យថា មូលហេតុគឺមកពីគ្រួសារសុំរក្សាសិទ្ធិឯកជន៕ TK
 |
| ជនសង្ស័យធ្វើឃាតស្ត្រីហូឡង់និងកូនស្រី ពេលនាំមកតុលាការ។ KOAM CHANRASMEY |
Blogger Comment
Facebook Comment