ស្ទឹងត្រែង ៖ រថយន្តសាំយ៉ុងបើកមិនប្រកាន់ស្តាំបានជ្រុលទៅបុករថយន្តវីហ្គោពេញទំហឹងបណ្ដាលឲ្យអ្នកបើកបររថយន្តវីហ្គោបានកៀបនឹងកាប៊ីនស្លាប់ភ្លាមៗនៅនឹងកន្លែងកើតហេតុ និងមនុស្សជិះក្នុងរថយន្តសាំយ៉ុងបានរងរបួសធ្ងន់១១នាក់ត្រូវបានរថយន្តសង្គ្រោះរបស់ស្នងការដ្ឋាននគរបាលខេត្ត និងរថយន្តសង្គ្រោះរបស់អាវុធហត្ថខេត្ត ដឹកយកមកសង្គ្រោះបន្ទាន់នៅមន្ទីរបង្អែកពេទ្យខេត្ត។
ករណីគ្រោះថ្នាក់ចរាចររថយន្តបុករថយន្តដ៏គួរឲ្យរន្ធត់នេះបានកើតឡើងនៅវេលាម៉ោង២និង៤៥នាទីថ្ងៃទី២១ ខែឧសភា ឆ្នាំ២០១៤ត្រង់ចំណុចដុងកាចែម ស្ថិតក្នុងភូមិគីឡូប្រាំបី សង្កាត់សាមគ្គី ក្រុងស្ទឹងត្រែង។ មន្ត្រីនគរបាលចរាចរបានប្រាប់ឲ្យដឹងថា រថយន្តវីហ្គោជិះគ្នា២នាក់ ដោយអ្នកបើកបរគ្រោះថ្នាក់ដល់ស្លាប់មាន ឈ្មោះឡេង ប៊ុនឡុងភេទប្រុសអាយុ៣១ឆ្នាំ រស់នៅភូមិបឹងការចូត ឃុំព្រែកកក់ ស្រុកស្ទឹងត្រង់ ខេត្តកំពង់ចាម និងអ្នករួមដំណើរជាមួយរងរបួសស្រាល ឈ្មោះបន ម៉ុលភេទប្រុសអាយុ២៣ឆ្នាំ រស់នៅភូមិអូរស្វាយ ឃុំព្រែកកុយ ស្រុកកងមាសខេត្តកំពង់ចាម។
ចំណែកអ្នកបើកបររថយន្តសាំយ៉ុងមានឈ្មោះផាត ឧសភា ប្រុសអាយុ២០ឆ្នាំរបួសធ្ងន់ រីឯ១០នាក់ទៀតរបួសធ្ងន់មិនត្រូវបានគេស្គាល់ឈ្មោះនោះទេ។ មន្ត្រីចរាចរបានបន្តឲ្យដឹងទៀតថា នៅមុនកើតហេតុគេបានឃើញរថយន្តសាំយ៉ុងពណ៌សពាក់ស្លាកលេខស្ទឹងត្រែង2A0216ដឹកអ្នកដំណើរចេញពីស្រុកសៀមប៉ាងមានគ្នាជាង១០នាក់ និងរថយន្តវីហ្គោមកពីខេត្តកំពង់ចាមជិះគ្នា២នាក់ ពណ៌ត្រីឆ្លូញ ពាក់ស្លាកលេខភ្នំពេញ 2M4658ក្នុងទិសដៅបញ្ច្រាសគ្នា។
លុះមកដល់ចំណុចកើតហេតុរថយន្តសាំយ៉ុងមិនប្រកាន់ស្តាំបានជ្រុលទៅបុករថយន្តវីហ្គោពេញទំហឹងធ្វើឲ្យអ្នកបើកបររថយន្តវីហ្គោកៀបនឹងកាប៊ីនរថយន្តស្លាប់ភ្លាមៗនៅនឹងកន្លែងតែម្តង។ ចំណែកអ្នកជិះក្នុងរថយន្តសាំយ៉ុង១១នាក់របស់ធ្ងន់ទាំងអស់ ភាគច្រើនបែកក្បាលបែកមុខ ក្នុងនោះមានម្នាក់ប្រហែលជាគ្មានសង្ឃឹមនោះទេ។ សមត្ថកិច្ចបានបន្តថា ក្រោយកើតហេតុរថយន្តសង្គ្រោះកម្លាំងអាវុធហត្ថ និងរថយន្តស្នងការដ្ឋាននគរបាលខេត្តបានចុះទៅធ្វើការសង្គ្រោះភ្លាមៗ ដឹកជនរងគ្រោះមកសង្គ្រោះបន្ទាន់នៅមន្ទីរពេទ្យបង្អែកខេត្ត។
ចំណែករថយន្តទាំង២ត្រូវបាននគរបាលចរាចរធ្វើការវាស់វែង ដឹកយកមករក្សាទុកនៅស្នងការដ្ឋាននគរបាលខេត្ត ដើម្បីចាត់ការតាមនីតិវិធីច្បាប់។ សពជនរងគ្រោះត្រូវបានប្រគល់ឲ្យក្រុមគ្រួសារយកទៅស្រុកកំណើតធ្វើបុណ្យតាមប្រពៃណី៕
Blogger Comment
Facebook Comment