ភ្នំពេញ ៖ មហាសន្និបាតអង្គការសហប្រជាជាតិ (អ.ស.ប) បានសម្រេចអនុម័តលើកញ្ចប់ថវិកាឧបត្ថម្ភចំនួន១៥,៥ លានដុល្លារអាមេរិកដល់ភាគីអន្តរជាតិនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) នេះបើតាមសេចក្តីប្រកាសរបស់សាលាក្តីកាលពីថ្ងៃទី២៣ ខែឧសភា ឆ្នាំ២០១៤។
សេចក្តីប្រកាសនោះលើកឡើងថា ថវិកាឧបត្ថម្ភធននេះត្រូវបានចាត់ទុកថាជាថវិកាបម្រុង បន្ថែមទៅលើការផ្តល់ប្រាក់វិភាគទានស្ម័គ្រចិត្តសម្រាប់ភាគី អន្តរជាតិនៃសាលាក្តីខ្មែរក្រហមសម្រាប់រយៈពេលពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ ២០១៤។
ថវិកាបម្រុងនេះអាចអនុញ្ញាតឲ្យអង្គការសហប្រជាជាតិធ្វើកិច្ចសន្យាការងារជាមួយមន្ត្រីបុគ្គលិកអន្តរជាតិ នៃតុលាការសម្រាប់រយៈពេលមួយឆ្នាំ។ ថវិកាឧបត្ថម្ភធនអាចនឹងត្រូវដកបានលុះត្រាតែមិនមានថវិកាគ្រប់គ្រាន់ពីការផ្តល់វិភាគទានស្ម័គ្រចិត្ត។
លោក បានគីមូន អគ្គលេខាធិការ អ.ស.ប បានស្នើសុំទៅមហាសន្និបាតអនុញ្ញាតឲ្យមានថវិកាឧបត្ថម្ភធននេះ ដើម្បីឆ្លើយតបទៅនឹងការកើនឡើងនៃបញ្ហាប្រឈមផ្នែកហិរញ្ញវត្ថុ និងការខ្វះថវិកាដែលអ.វ.ត.ក ធ្លាប់មានបទពិសោធន៍ជួបប្រទះនៅអំឡុងប៉ុន្មានឆ្នាំចុងក្រោយនេះ។
នៅក្នុងសំណើរបស់ខ្លួន លោកអគ្គលេខាធិការបានសរសេរថា ថវិកានេះមានសារៈសំខាន់ណាស់ ដែលសហគមន៍អន្តរជាតិត្រូវធានាថា អង្គជំនុំជម្រះវិសាមញ្ញក្នុងតុលាការកម្ពុជាមានមធ្យោបាយហិរញ្ញវត្ថុគ្រប់គ្រាន់ ដើម្បីជំនុំជម្រះក្តីទៅលើឧក្រិដ្ឋកម្មដែលបានប្រព្រឹត្តឡើងដោយអតីតរបបខ្មែរក្រហម។
មហាសន្និបាតបានស្នើថា អគ្គលេខាធិការ អ.ស.ប ត្រូវរៀបចំរបាយការណ៍មួយដែលរួមមានការត្រួតពិនិត្យឲ្យបានច្បាស់លាស់នូវគម្រោងចំណាយរបស់សាលាក្តី នាពេលអនាគត ដែលរបាយការណ៍នេះនឹងត្រូវដាក់បង្ហាញនៅក្នុងមហាសន្និបាត នាពេលខាងមុខ ហើយធានាថា សាលាក្តីកាត់ទោសអតីតមេដឹកនាំខ្មែរក្រហមត្រៀមរៀបចំយុទ្ធសាស្ត្របញ្ចប់ដោយមានផែនការច្បាស់លាស់។
បើទោះបីជាថវិកាឧបត្ថម្ភធនបានធ្វើឲ្យស្ថានភាពហិរញ្ញវត្ថុសម្រាប់ភាគីអន្តរជាតិ នៃសាលាក្តីមានស្ថិរភាព ប៉ុន្តែនៅតែមានការខ្វះសាច់ប្រាក់សម្រាប់ភាគីជាតិដដែល។ លោកឯកអគ្គរដ្ឋទូត ដេវីត សេហ្វ័រ អ្នកជំនាញការពិសេសរបស់ឯកឧត្តមអគ្គលេខាធិការអង្គការសហប្រជាជាតិផ្នែកជំនួយលើសាលាក្តីខ្មែរក្រហម បាននិងកំពុងធ្វើការងារយ៉ាងជិតស្និទ្ធជាមួយតំណាង រាជរដ្ឋាភិបាលកម្ពុជាដើម្បីកៀងគរជំនួយបន្ថែម ដើម្បីបំពេញបន្ថែមថវិកាដែលនៅខ្វះសម្រាប់ភាគីជាតិ៕
Blogger Comment
Facebook Comment