កំពង់ឆ្នាំង ៖ បុរសវ័យជាង៥០ឆ្នាំម្នាក់បានស្លាប់កៀបជាប់ក្នុងកាប៊ីនរថយន្តរបស់ខ្លួនយ៉ាងអាណោចអាធ័មក្រោយពីរូបគាត់បានបើករថយន្តយីឌុបទៅបុកគូថរថយន្តក្រុងពីក្រោយពេញទំហឹងរួចមក។ ហេតុការណ៍នេះបានកើតឡើងនៅវេលាម៉ោង១០និង៤៥នាទីថ្ងៃទី២៤ ខែឧសភា ឆ្នាំ២០១៤ តាមបណ្តោយផ្លូវជាតិលេខ៥ ចន្លោះគីឡូម៉ែត្រលេខ៧២និង៧៣ ស្ថិតក្នុងភូមិត្រពាំងក្រពើ ឃុំទឹកហូត ស្រុករលាប្អៀរ ខេត្តកំពង់ឆ្នាំង។
លោកនាយការិយាល័យចរាចរណ៍ផ្លូវគោកបានប្រាប់នៅកន្លែងកើតហេតុថា បុរសរងគ្រោះឈ្មោះ ឆក អាយុ៥៥ឆ្នាំ (ជាតៃកុងបើករថយន្តអោយគេ) បានបើករថយន្តយីឌុបពណ៌ខៀវលឿង ពាក់ស្លាកលេខ បាត់ដំបង3A-0021 ដឹកដែកពីក្រុងភ្នំពេញទៅក្រុងប៉ោយប៉ែត ខណៈមកដល់ចំណុចកើតហេតុខាងលើ និងដោយសារល្បឿនរថយន្តលឿនផងនោះក៏បានបុកគូថរថយន្តក្រុងរិទ្ធមុនីពណ៌សខៀវ ពាក់ស្លាកលេខ បាត់ដំបង 3A-1158 ដែលកំពុងបង្អង់រកកន្លែងឈប់ពីក្រោយក្នុងទិសដៅស្របគ្នាពេញទំហឹងបណ្តាលអោយតៃកុងរថយន្តយីឌុបកៀបខ្លួនជាប់ជាមួយដៃចង្កូតស្លាប់ភ្លាមៗមួយរំពេច ដោយឡែកអ្នកដំណើរនៅក្នុងរថយន្តក្រុងមាននារីម្នាក់ឈ្មោះ អឿន អាយុ២៤ឆ្នាំ បានរងរបួសស្រាលដោយសារទូរទស្សន៍ធ្លាក់ត្រូវចំថ្ពាល់ខាងឆ្វេង។
នៅកន្លែងកើតហេតុកម្លាំងនគរបាលចរាចរណ៍ខេត្តស្រុកបានសហការជាមួយនគរបាលប៉ុស្តិ៍មូលដ្ឋាន និងប្រជាពលរដ្ឋដែលធ្វើដំណើរតាមផ្លូវជួយយករថយន្តទាញរថយន្តទាំង២ផ្តាច់ពីគ្នា និងសម្រួលចរាចរណ៍កុំអោយមានការកកស្ទះ ព្រមទាំងជួយគាស់កាប៊ីនរថយន្តយកសពបុរសរងគ្រោះបាននៅម៉ោង១និង១០នាទី។ សពតៃកុងរថយន្តយីឌុបត្រូវបានសមត្ថកិច្ចទាក់ទងរកក្រុមគ្រួសារសាច់ញាតិមកទទួល ហើយរថយន្តទាំង២គ្រឿងត្រូវបានយកមករក្សាទុកនៅស្នងការដ្ឋាននគរបាលខេត្តកសាងសំណុំរឿងដោះស្រាយតាមនីតិវិធី៕
Blogger Comment
Facebook Comment